Il-programm LEAD tal-Partit Laburista kompla jissaħħaħ b’31 mara oħra jingħaqdu f’dan il-programm li għandu l-għan li jżid is-sehem tal-mara fil-politika.

F’konferenza tal-aħbarijiet flimkien mal-parteċipanti l-ġodda l-koordinatriċi tal-programm, l-MEP Miriam Dalli, spjegat kif il-parteċipanti ġejjin minn oqsma differenti tal-ħajja u għandhom ukoll etajiet differenti. “Konvinta li bis-sehem tagħhom mhux biss se jgawdi l-Partit Laburista iżda wkoll il-pajjiż,” qalet Dalli li spjegat x’jinvolvi l-programm.

Il-President tal-Partit Laburista, Daniel Micallef, saħaq li dan hu programm li f’Ġunju li għadda diġa’ wera s-suċċess tiegħu meta 84% ta’ dawk li kkontestaw l-elezzjonijiet lokali ġew eletti. Hawn tkellem fuq il-miri ambizzjużi tal-Partit Laburista biex fuq medda ta’ snin ikun hemm numru ugwali bejn is-sessi fil-kandidatura tal-Partit Laburista.

Il-programm hu maħsub ukoll biex il-Partit Laburista jkun lest għal meta l-gvern jimplimenta bidliet għall-ugwaljanza fil-politika.

Dan hu r-raba’ grupp ta’ parteċipanti bis-Segretarja tal-Eżekuttiv tal-Partit Laburista Lydia Abela tkellmet dwar kif tul l-intervisti ħareġ ċar kemm dawn in-nisa għandhom ideat u sehem x’joffru lis-soċjetà. Spjegat kif bħala parti mill-applikazzjoni jkunu mitluba jippreżentaw numru ta’ inizjattivi u minn hawn ħareġ kemm għandhom kontribut x’jagħtu lid-dinja politika.