Illum kelli d-dibattitu mal-Kap tal-Oppożizzjoni fejn ħsibtu ġej b’xi argument ġdid għaliex ilu mill-ġimgħa li għaddiet jgħid li jrid dibattitu ieħor. Kien dibatittu li fih fil-verita il-Kap tal-Oppożizzjoni, sfortunatament, ikkonferma kemm il-Partit Nazzjonalista intilef u tilef lilu innifshu. Dan qalu l-Prim Ministru u Mexxej tal-Partit Laburista Joseph Muscat meta kien qed jindirizza attivita politika fil-Fgura.
Dr Muscat sostna kif Adrian Delia qal li l-Partit Nazzjonalista dejjem emmen fil-kunsilli lokali u kien hu li għamilhom, allura staqsa Dr Muscat kif f’23 lokalita ma ħarġuwx biżejjed kandidati. L-istess ħaġa qal għal-Ewropa li l-PartitNazzjonalista dejjem emmen fl-ewropa u fl-ideali ewropej. Dr Muscat sostna li ma jaħsibx li għadhu jemmen, għaliex dak li qed jgħid huwa kontra r-regoli tal-Unjoni Ewropea u ma jistax jseħħ għax il-liberta tal-moviment ma tistax twaqqafha. “Meta ma tkunx taf x’inhuma l-prinċipji tiegħek, meta ma tifhimx dak li tkun qed tgħid tispiċċa tagħmel kuntradizzjonijiet bħal dawn,” sostna Dr Muscat.
Adrian Delia għamel argument li hemm Ministru jgħid hekk u Ministru ieħor jgħid hekk u saqsa lill Prim Ministru jaqbilx magħhom. Dr Muscat rrisponda li “naqbel mal-Ministri u d-deputati kollha tiegħi u anka huma jaqblu miegħi, ma naħsibx li inti għandek il-lussu tgħid li għandek il-membri parlamentari kollha jaqblu miegħek”.
Dr Muscat spjega kif illum ħabbru strateġija dwar l-Esport fejn fl-għaxar snin li ġejjin dan il-qasam sa jkun qed jipproduċi ġid daqs 1% tal-ekonomija u 2200 impjieg ġdid. Sostna li din hija aħbar tajba għall-familji Maltin u Għawdxin li x-xogħol ġej u ser jibqa’ ġej.
Dwar it-toroq, il-Kap tal-Oppożizzjoni qal li qed neħlu l-flus fix-xejn għax qed ninvestu €700M biex nirranġaw it-toroq kollha tal-pajjiż. “Insaqsi qed neħlu l-flus jew hija ħaġa li l-poplu ilu jistenna sena wara l-oħra,” staqsa Dr Muscat. Dr Muscat qal li Adrian Delia ħareġ b’teorija li iktar ma twessa t-toroq iktar in-nies ħa jixtru karozzi. Spjega li skont rapport ta’ Dr Gordon Cordina bit-toroq li se jsiru se jonqos it-tniġġiż, se jiġu ffrankati 5M siegħa u l-familji Maltin u Għawdxin se jiffrankaw €24M fi fuel. Fl-istess waqt qed ikomplu jaħdmu sabiex it-trasport pubbliku jkun b’xejn għal kulħadd fejn saħansitra jibdew jħallsu lill min juża t-trasport pubbliku. Dr Muscat sostna li b’dan il-mod qed ikompli juri min għandu viżjoni f’dan il-pajjiż u min m’għandux.
