aħbarijiet

February 12, 2023

“Fiduċja li ninvestu biex ikollna pajjiż isbaħ u li jilħaq mal-aspirazzjonijiet ta’ kull wieħed u waħda minnha.” – il-PM

“Pajjiż isbaħ. Pajjiż b’saħħtu li fih ngħollu l-kwalita tal-ħajja. Dan hu meta ngħidu fiduċja f’pajjiżna.” 

F’intervista fiċ-Ċentru Laburista tal-Msida, il-Prim Ministru u Mexxej tal-Partit Laburista, Robert Abela sostna kif dan hu Gvern li ma jaqta’ qalbu qatt u s-sehem tal-ħaddiem kollha, ġejjin minfejn ġejjin huwa importanti.

“Is-sehem tal-ħaddiema kollha ġejjin minn fejn ġejjin huwa importanti. Iżda ladarba qed nibgħu noħolqu opportunitajiet ta’ xogħol b’saħħithom, fl-istess ħin li għandna l-inqas rata ta’ qgħad, u allura din, filwaqt li hi xi ħaġa sabiħa, toħloq anke sfida u l-ħtieġa ta’ biżżejjed riżors uman. 

F’dan il-kuntest irridu wkoll li ż-żgħażagħ tagħna jkunu fl-aħjar pożizzjoni biex jaħtfu l-aqwa opportunitajiet ta’ karrieri li joffri s-suq. Qabel xejn mhux biex naqdu s-suq, imma karrieri biex ikollhom is-sodisfazzjon u l-kwalità tal-ħajja, karrieri li bihom jilħqu l-aspirazzjonijiet tagħhom, jiksbu l-indipendenza, irabbu familja u jkunu f’pożizzjoni li jtejbu l-istudji tagħhom. 

Dan hu x’inhu s-settur.  Jekk hux il-gaming, is-servizzi finanzjarji, l-avjazzjoni jew il-manifattura speċjalizzata, biex nagħti ftit eżempji. U għalhekk, l-investiment kbir li qed nagħmlu fl-edukazzjoni.”

Hawnhekk, il-Prim Ministru semma wkoll kif dan hu Gvern li jrid li ż-żgħażagħ tagħna jkunu fl-aħjar pożizzjoni li jaħtfu l-aqwa opportunitajiet ta’ karrieri li joffri s-suq. 

“Aħna hemm sal-lum għandna sistemi li l-istudenti li jmorru apprentisti jitħallsu r-rata tal-paga minima għal kull siegħa li jaħdmu. Imma din ir-rata sal-lum, tintlaħaq billi tgħodd l-istipendju, il-grant u dak li mbagħad tħallas għall-apprentistat. Kollox flimkien jgħaqqad paga nimina fis-siegħa. Fhimna li rridu ngħamlu aħjar minn hekk. 

Fhimna  li qabel xejn l-istudent kien jistħoqqlu iktar, imma wkoll li din kienet sistema li mhix tinċentiva biżżejjed biex wieħed jidħol għall-kors li marbut miegħu ikollu l-apprentistat. U f’ċerti setturi dan l-apprentistat huwa wieħed importanti. 

X’qed ngħamlu allura? F’dik li nemmnu li issa hija skema ferm iktar ġusta. 

Se nibdew li:

• Jekk għandek l-istipendju u l-grant iżżommu, għax dak tiegħek bħal mhu ta’ kull student ieħor;
• Imma imbagħad ta’ kull siegħa li taħdem – titħallas bil-paga minima. Iġifieri mhux paga minima inkluż l-istipendju u l-grants, iżda paga minima u l-istipendji u l-grants 
• Li jfisser li f’sena waħda se ninvestu mijiet ta’ eluf ta’ ewro oħra biex l-istudenti jkollhom dan id-dħul aħjar. Se jibbenefikaw madwar elf student li qed jibdew l-apprentistat f’dawn il-jiem. 

Biex nagħti eżempju wieħed, jekk għandek student tal-ewwel sena li jagħmel 600 siegħa apprentistat, il-massimu ta’ sigħat, jista’ jara differenza favorih ta’ elf ewro. B’kollox fuq kull sena se ninvestu iktar minn sitt mitt elf ewro għal madwar elf student. 

U hekk qed inwettqu miżura oħra tal-manifest elettorali.” 

Mistoqsi dwar il-laqgħa li kellu mal-Mexxejja Ewropej fil-Kunsill tal-Unjoni Ewropea fi Brussell, il-Prim Ministru spjega kif ġiet diskussa l-ekonomija Ewropea u li ma taqtax lura anke mqabbla mal-ekonomiji ġganti oħra madwar id-dinja. 

“Irridu li l-industriji jibqgħu jsibu l-kontinent Ewropew bħala wieħed attraenti. U nibqa’ ngħid u nisħaq li fost oħrajn dan tagħmlu billi tiċentiva n-negozji mhux l-inqas dawk żgħar u medji. Għalhekk xi ħaġa importanti fil-konklużjonijiet tal-Kunsill kienet l-inklużjoni ta’ referenza għan-negozji żgħar u medji li bħala pajjiż nemmnu li huma sħab ewlenin fl-iżvilupp ekonomiku. Għalija li l-Kunsill Ewropew mmarka dan hu ta’ sodisfazzjon kbir, għax dan kollu huwa xhieda ta’ kemm il-messaġġ ta’ pajjiżna huwa wieħed tajjeb u li qed jasal.”

Robert Abela saħaq ukoll kif ir-Rapport tal-Fond Monetarju Internazzjonali reġa’ kkonferma s-saħħa tal-ekonomija tagħna. 

“Il-Fond Monterju Internazzjonali faħħar l-andament ekonomiku ta’ pajjiżna, u jekk ikun hawn min għal xi mument jaħseb li ż-żewġ partiti jagħtu l-istess riżultati kemm jagħmel google search għall-aħħar rapporti li kellna fi żmien amministrazzjoni Nazzjonalista.” 

Il-Prim Ministru wera d-differenza bejn amministrazzjonijiet differenza, tant li llum, l-esperti tal-IMF jikkonkludu li l-politika tal-Gvern fuq l-enerġija għenet il-kunfidenza ekonomija u s-saħħa tal-pagi. 

“Fuq kollox, u hawn joħroġ il-bżonn tal-istabbilta ekonomika, ir-rapport tagħhom l-IMF, bħal ħafna oħrajn, laqgħu l-fatt li ngħatajna mandat ġdid għax dan ifisser kontinwita ta’ politika ekonomika li huma jaqblu magħha… Ħu l-bejgħ f’Diċembru – mhux talli ż-żieda f’Malta kienet l-ikbar fl-Ewropa, imma talli fl-Ewropa f’dan ix-xahar tant importanti mhux talli ma żdiedx il-bejgħ, talli naqas. U pajjiżi oħra li żiedu l-piżijiet fuq iċ-ċittadini kienu l-aktar li raw tnaqqis.” 

Dwar il-proġetti ambjentali f’pajjiżna, il-Prim Ministru qal li l-immaniġġjar aħjar tat-traffiku, proġetti kontra l-għargħar u spazji miftuħa ġodda jibqgħu l-prijoritajiet ewlenin. 

“Il-proġett tal-Imsida huwa l-proġett il-kbir li jmiss fis-settur tal-infrastruttura. Imma se jkun ukoll imżewweġ mal-prijorità ambjentali tagħna… Nista’ ngħidlek li  ftit xhur oħra joħroġ it-tender ħalli l-proġett jibda. Se jkun wieħed mill-proġetti infrastrutturali importanti ta’ din il-leġiżlatura. Nifhmu li trid il-kuraġġ biex tidħol għal proġett ta’ dan it-tip f’żona li hi daqshekk popolari u partikolari, iżda żgur li ma nistgħux ngħidu lill-ġenerazzjonijiet ta’ warajna li ma kellniex il-kuraġġ niddeċiedu. 

U niddeċiedu anke billi nisimgħu. Dan proġett fejn urejna li gvern li jikkonsulta u jisma’, tant li l-Kunsilli Lokali tal-Imsida u l-Pietà huma ferm iktar sodisfatti u llum huma favur il-proġett. 

Għax dan hu meta ngħidu fiduċja f’pajjiżna. 

Fiduċja li ninvestu biex ikollna pajjiż isbaħ u li jilħaq mal-aspirazzjonijiet ta’ kull wieħed u waħda minnha. 

Pajjiż isbaħ

Pajjiż b’saħħtu 

Li fih ngħollu l-kwalita tal-ħajja.”