aħbarijiet

February 26, 2023

“F’mument tal-akbar sfidi, joħorġu b’aktar saħħa l-prinċipji u t-twemmin tagħna.” – il-PM

“Nibnu fuq it-tajjeb ħafna tajjeb li sar. Nindirizzaw fejn meħtieġ nindirizzaw. Hekk tajtkom il-kelma li se nagħmlu meta ġejt għandkom biex tafdawni bit-tmexxija ta’ dan il-partit. Hekk wgħedt il-poplu meta sena ilu, proprju bħal daż-żmien, kont qed nitolbu jafdani bl-ewwel mandat tiegħi. U aħna meta nagħtu kelma nżommuha.”

Dan qalu l-Prim Ministru u Mexxej tal-Partit Laburista, Robert Abela f’Ħal Għaxaq fejn sostna kif b’mod konsistenti, tul din l-aħħar sena, intbagħat messaġġ ċar li dan hu Gvern li jrid jieħu ħsieb in-nies. 

“Sfidi kellna, għandna u se jibqa’ jkollna. Imma kienet din l-attitudni, responsabbli u serja, li waslet biex quddiem kull sfida, dan il-pajjiż baqa’ miexi ’l quddiem. U l-kelma tiegħi hi, li se jibqa’ miexi ‘l quddiem.”

Il-Prim Ministru elenka kif din l-atitudni kienet riflessa f’diversi sitwazzjonijiet fosthom l-esperjenza tal-FATF fejn kienet prova mill-aktar b’saħħitha ta’ kif minn sfida, inħolqot opportunità li permezz tagħha, issaħħet il-governanza f’pajjiżna. 

“U hija wkoll din l-attitudni li se nieħdu b’rabta mal-konċessjoni tal-isptarijiet li dwarha kien hemm sentenza tal-Qorti Ċivili nhar il-Ġimgħa li għadda… Id-direzzjoni aħħarija li tajt kienet li Steward trid tonora l-obbligi tagħha f’pajjiżna u li ladarba kien hemm każ il-Qorti l-gvern b’rispett lejn is-saltna tad-dritt kien se jistenna wkoll l-eżitu ta’ dik l-kawża.” 

Wara li l-qorti tat id-deċiżjoni tagħha, il-Prim Ministru sostna li bħalma sar dejjem, se tiġi rispettata l-eżitu ta’ dik is-sentenza. 

“Għandna f’pajjiżna saltna tad-dritt b’saħħitha u dan il-Gvern se jiddefendiha. Niddefenduha meta tattakkaha l-Oppożizzjoni u niddefenduha meta tattakaha Steward, għax fejn jidħol l-interess ta’ Malta għalina m’għandu jidħol xejn.”

Il-Prim Ministru qal ukoll kif issa l-Gvern mhux se jieqaf hawn. Il-Gvern jaf sew x’inhuma l-passi li jmiss b’mod partikolari ladarba jkun eżawrit il-proċess legali.

“Irrid dalgħodu nagħti s-serħan il-moħħ fuq tliet affarijiet – 

• L-ewwel. Se nkun qed nassigura li nħarsu l-interess nazzjonali f’kull deċiżjoni li tittieħed. Dik hi r-responsabbilta li tfajtu fuqi, u d-deċiżjoni li nieħu jkunu mnebbħa minn dan. 
  
• It-tieni. L-impjegati li llum jaħdmu f’dawn l-isptarijiet u li jagħtu servizz tant tajjeb lill-Għawdxin u lill-anzjani f’Karin Grech, fost oħrajn, inserħilhom rashom li l-impjiegi tagħhom huma garantiti. Serrħu raskom li Malta għandha bżonn is-servizzi tagħkom. 
  
• It-tielet. Li s-servizz tas-saħħa f’dawn l-isptarijiet se jibqa’ għaddej. Għaliex irrid nemfasizza din, li f’dawn l-isptarijiet għandna pazjenti li jmorru jinqdew ta’ kuljum. Mhux fuq bini qed nitkellmu, imma fuq nies. Il-Gvern għandu pjan ċar għal dan il-għan. Għalina l-pazjent huwa l-prijorità u dan bil-fatti.”

Robert Abela qal ukoll kif il-Partit Laburista dejjem ħaddan prinċipju li jkun man-nies. 

“It-tweġiba konsistenti li stajt nagħtihom b’kunfidenza hi li fil-ħidma tagħna se nibqgħu nipprijoritizzaw in-nies. Li se nibqgħu nkunu magħhom.”

Il-Prim Ministru saħaq ukoll kif matul l-aħħar xhur ittieħdu deċiżjonijiet strateġiċi importanti mmirati biex jipproteġu lill-familji.

• Stabbilta fil-kontijiet tal-enerġija; 
• Stabbilta fil-prezzijiet tal-fjuwil;
• Għajnuna fuq prezzijiet tal-ġwież;
• Mekkaniżmu addizzjonali biex jikkumpensa għall-għoli tal-ħajja.

Il-Prim Ministru temm id-diskors b’messaġġ ta’ fiduċja – 

“Għax hekk tfisser li tibni fuq it-tajjeb. Din hi l-viżjoni tagħna. Hekk insarrfuha l-fiduċja f’pajjiżna. Għalhekk Kellna sfidi kbar u għelibnihom. Fdajtuni biex it-tajjeb nibnu fuqu u fejn meħtieġ nagħmlu aħjar. U allura dak se nibqgħu nagħmlu fiż-żmien li ġej. Għax dan pajjiż li mimli potenzjal. Dan pajjiż fejn kulħadd irid ikollu ċ-ċans jilħaq l-aspirazzjonijiet tiegħu.  Dan pajjiż sabiħ li għandna fiduċja fih.”