aħbarijiet

February 19, 2023

“Għandna fiduċja fikom. Għandna fiduċja fl-Għawdxin u l-Maltin kollha.” – il-PM

“Il-fiduċja f’pajjiżek iżżommha billi n-nuqqasijiet tagħrafhom u tindirizzahom, billi s-sabiħ tapprezzah, issaħħu u tippromwovih, billi l-futur taħdem għalih kuljum biex ikun isbaħ. U isbaħ se jkun għax għandna fiduċja f’pajjiżna.” 

Dan qalu l-Prim Ministru u Mexxej Laburista, Robert Abela fil-Birgu fejn semma kif bħal daż-żmien sena, kienet bdiet il-kampanja Malta Flimkien, pjan li llum sodisfatt li qed jitwettaq ma’ kull jum li jgħaddi. 

“Lanqas għaddiet sena mill-bidu tal-kampanja elettorali u komplejna nżommu kelmtna mal-Għawdxin u l-Maltin b’ritmu liema bħalu.”

Il-Prim Ministru spjega kif minn għada, iż-żgħażagħ se jkunu jistgħu japplikaw biex igawdu minn miżura oħra maħsuba biex tgħinhom isiru sidien ta’ djarhom. 

“Għednilkom li jekk ningħataw il-fiduċja nintroduċu miżura oħra biex il-pakkett ta’ għajnuna lill-first-time buyers ikun l-ikbar li qatt kien. U hekk għamilna. Kull first-time buyer li jieħu self biex isir sid daru, se nagħtuh għotja ta’ elf ewro fis-sena fuq l-ewwel għaxar snin.”

Miżuri oħrajn immirati direttament lejn iż-żgħażagħ huma eżenzjoni mit-taxxa tal-boll u inċentivi kbar għal min jixtri f’Urban Conservation Area, fost oħrajn. 

Robert Abela ġab eżempju biex jispjega s-sostenn li jirċievu koppji li jsiru sidien ta’ djarhom. Dawk li jixtru dar modesta biex jirranġawha u jgħixu fiha, issa mhux se jħallsu ċenteżmu f’taxxa tal-boll. Fuq proprjetà ta’ €300,000, imqabbel ma’ qabel il-bidla fil-Gvern fl-2013, dawn jiffrankaw kważi €13,000 f’taxxi. Barra minn hekk, jieħdu wkoll grant ta’ €15,000 b’miżura li ddaħħlet is-sena l-oħra għal min jixtri f’UCA. U issa se jieħdu għotja oħra ta’ €10,000. Sostenn ta’ €38,000. U b’rabta mal-ispejjeż biex jirrestawraw id-dar, jingħataw għotja sa massimu ta’ €54,000. Dan hu l-mod kif qed jingħataw il-ħajja l-ibliet u rħula tagħna. 

“Minkejja ċ-ċirkostanzi internazzjonali ta’ sfida li qed noperaw fihom, aħna bqajna nwettqu l-pjan tagħna. Għax hu pjan maħsub. Hu pjan serju u costed.  Għalhekk magħna l-Maltin jafu fejn qegħdin. Għax nagħtu kelma u nżommuha. 

Għidna li se nżidu l-għajnuna lill-pensjonanti u żidniha.

Għidna li se nsostnu lill-familji u żidnielhom ic-children’s allowance. 

Għidna li se ngħinu lill-first time buyers. U hekk qed nagħmlu. 

U lil dawn kollha, ma dak li tajnihom din is-sena, fl-erbgħa snin li jmiss se nagħtuhom aktar.

Għax jekk fi ftit xhur tellaqna dan kollu, ir-riżultati ekonomiċi sbieħ li se jseħħu minħabba l-miżuri li qed indaħħlu u l-inizjattivi li qed nieħdu, se jkunu l-pedament biex ma dak li għamilna nagħmlu iktar, u ma dak li ksibna, niksbu iktar.”

Il-Prim Ministru rrimarka wkoll il-fiduċja kbira fil-potenzjal li għandha l-Kottonera. 

“Għalhekk qegħdin nagħmlu hawn investiment rekord. Għalhekk se nkomplu ninvestu fi proġetti ta’ fejda. 

Mill-infrastruttura, għar-restawr, għall-ambjent u l-isport. 

Għandna għat-tlett ibliet fost l-iktar proġetti sbieħ u ambizzjużi. 

Biex intejbu l-kwalità tal-ħajja ta’ dawk li jgħixu hawn, biex inpaxxu lil dawk li jżuru din iż-żona tant sabiħa. Għalina l-Kottonera tfisser potenzjal u l-ewwel li rridu jilħqu l-potenzjal tagħhom huma niesha.”

Robert Abela qal ukoll kif dan il-gvern huwa kommess li f’din il-leġiżlatura, daqskemm iridu jinħolqu spazji ġodda, jeħtieġ li nsebbħu li għandna u flimkien mat-tkabbir ekonomiku tingħata spinta bla preċedent ħalli tkompli titjieb il-kwalità tal-ħajja tan-nies. 

Il-Prim Ministru aċċena wkoll kif il-Partit Laburista fil-Gvern wettaq bidliet kbar li ssarrfu f’riżultati pożittivi fosthom il-mod kif l-impjiegi żdiedu b’aktar minn €100,000 u l-mod kif fis-sena li għaddiet, għall-ewwel darba fl-istorja, minn kull għaxar vetturi ġodda, sitta ma jaħdmux biss bil-petrol jew bid-diżil imma jużaw l-elettriku. 

“Din kienet, għadha u se tibqa l-konvinzjoni tiegħi fuq kif nagħmlu l-politika. Jekk il-familji Għawdxin u Maltin isibu l-Gvern warajhom, huma dejjem se jagħżlu l-aħjar għal pajjiżna. 

Din hi l-politika għalina. U biex nilħqu dawn l-għanijiet irridu naħdmu lkoll flimkien. 

U għax naħdmu lkoll flimkien mhux biss pajjiżna jimxi ‘l quddiem. 

Imma jkun wieħed mill-iktar li jimxi ‘l quddiem fl-Unjoni Ewropea kollha.”

Il-Prim Ministru temm b’messaġġ ċar favur li nkomplu ntejbu fuq it-tajjeb li jeżisti u nindirizzaw l-isfidi mingħajr biża’. 

“F’kemm ilna li ngħatajna l-fiduċja mill-2013 ‘il quddiem għamilna ħafna u ħafna tajjeb. 

Peró żbalji għamilna wkoll u nkunu suppervi jekk dawk l-iżbalji ma nindirizzawhomx. 

Għalhekk mill-ewwel darba li tajtuni l-fiduċja biex immexxi lil dan il-partit u dan il-pajjiż  adottajt politika konsistenti. Nibnu fuq il-ħafna tajjeb li sar, iżda fejn hemm x’nindirizzaw nindirizzawh mingħajr biża’. 

U dak hu l-politika li se nibqgħu nħadmu għaż-żmien li ġej. 

Għax il-fiduċja f’pajjiżek hemm iżżommha.”