Skip to content

Il-Prim Ministru u Mexxej tal-Partit Laburista, Joseph Muscat, esprima s-sodisfazzjon tiegħu dwar il-mod kif inhi magħmula d-delegazzjoni tal-Partit Laburista għall-Parlament Ewropew.

“Hemm taħlita tajba ħafna ta’ esperjenza u enerġija ġdida,” qal il-Prim Ministru li nnota d-differenza fl-età, ir-rappreżentanza ekwa bejn is-sessi u l-fatt li hemm MEP minn Għawdex. Joseph Muscat radd ħajr lill-kandidati kollha fuq il-lista tal-Partit Laburista.

F’laqgħa fl-uffiċċju tiegħu ma’ Miriam Dalli, Alfred Sant, Alex Agius Saliba u Josianne Cutajar, Joseph Muscat qal li fil-ġimgħat li ġejjin se jkun qed jikkunsidra n-nomina tal-persuna bħala Kummissarju Ewropew.

“Dan nagħmlu bl-aħjar interess tal-pajjiż f’moħħi. Jien ċert li r-rappreżentanti tal-Partit Laburista se jkunu qed jaħdmu biex iwasslu l-messaġġ dwar il-persuna, jew persuni magħżula,” qal il-Prim Ministru li spjega kif hemm linja ta’ ħsieb li jkun hemm żewġ persuni nominati minn kull Prim Ministru u jkun il-President il-ġdid tal-Kummissjoni Ewropea li jagħżel jew tagħżel. Joseph Muscat qal li dwar dan għad irid ikun hemm diskussjoni u meta l-proċedura tkun stabbilità se jkun qed jinnomina persuna jew persuni li jkollhom il-kredenzjali biex isiru Kummissarji Ewropej.

Irrefera għall-appell li għamel ilbieraħ li l-MEPs Maltin jaħdmu flimkien. “Aħna lesti li naqilbu l-folja,” qal Joseph Muscat li tenna kif filwaqt li l-MEPs m’għandhomx ikunu fan club tal-gvern għandu jkun hemm oġġettività.

Il-Prim Ministru spjega kif b’parlament maqsum bejn tant gruppi differenti l-personalità tal-persuna magħżula se tkun importanti iktar milli kienet fi drabi oħra.

 

 

Uffiċċju Komunikazzjoni

Partit Laburista

 

Aqsam ma' ħaddieħor

Share on facebook
Share on twitter
Share on linkedin