aħbarijiet

March 12, 2023

“Il-bidla li ġibna biex it-twemmin tagħna, li nwieżnu ż-żgħir u li nagħtu l-istess opportunitajiet lil kulħadd, daħħalnieh fil-prattika.”– il-PM 

“Il-poplu ried bidla għall-aħjar. U aħna għad għandna l-entużjażmu li bdejna bih, biex inwettqu l-bidla kuljum. Ħaddiehor ixerred politika ta’ dwejjaq. Ahna mmexxu politika realistika imma pożittiva.”

Dan kien il-mod kif il-Prim Ministru u Mexxej tal-Partit Laburista, Robert Abela spjega l-bidla li ġab il-Partit Laburista fl-aħħar għaxar snin waqt intervista fuq ONE Radio fejn saħaq kif il-mod kif minn pajjiż imwaħħal f’politika konservattiva ta’ żmien l-establishment, li għadu jmexxi biha l-Partit Nazzjonalista sal-lum, morna għall-politika progressiva. 

Il-Prim Ministru semma wkoll kif il-politika mħaddna minn dan il-Gvern rat soċjeta’ iktar ġusta. 

“Iktar ġusta kif? Billi kabbarna l-ekonomija ħalli stajna ninvestu fin-nies. Ħalli n-nies tgħix aħjar. Ħalli jekk qabel kienu jħallsu għaċ-childcare, dak bdejna nagħtuh b’xejn għax ridna li kulħadd ikollu ċ-ċans jaħdem. Il-mod kif ħadna u se nibqgħu nieħdu ħsieb il-pensjonanti tagħna, b’żidiet sena wara l-oħra, imma iktar minn hekk billi rajna li ma nkunux aħna li nżidu l-piżijiet… Miżuri li l-għan ewlieni tagħhom hu li kulħadd ikollu opportunita’ jimxi ’l quddiem.” 

Robert Abela saħaq ukoll l-importanza li nkomplu nibnu fuq it-tajjeb li għamilna iżda nirriformar fejn meħtieġ. 

“Quddiemna għandna pjan ċar ta’ elf proposta li nagħti l-kelma tiegħi li se naħdem biex isiru elf kisba ġdida għall-poplu tagħna fis-snin li ġejjin.”

Hawnhekk, il-Prim Ministru qal ukoll kif l-atitudni distruttiva tal-Oppożizzjoni tixhed id-differenza bejn il-Partit Nazzjonalista u l-Partit Laburista. 

“Oppożizzjoni li għadha taħseb li dak li għamlet hi kollu tajjeb u dak li jagħmel ħaddieħor kollu ħażin. Dak li għamel il-poplu kollu ħażin. Kienu u għadhom il-Partit tal-awsterita’. Il-Partit tal-qtiegħ il-qalb.”

Il-ħtieġa tar-regolarizzazzjoni u titjib fil-livell fir-riforma tas-settur tal-konstruzzjoni 

“Ħadna passi imma hemm bżonn nieħdu aktar.” 

Dwar dan is-settur, il-Prim Ministru tkellem dwar ix-xogħol li tagħmel il-Building Construction Agency. Awtorita’ li tirregola s-settur, li jekk kien hemm każ fejn xi ħadd ma ħadimx skont is-sengħa, jitwaqqfu x-xogħolijiet u tittieħed azzjoni. 

“Issa se mmorru pass ieħor, anke billi nwettqu wegħda oħra li għamilna fil-manifest elettorali Malta Flimkien. Dik li nilliċenzjaw il-kuntratturi li jwaqqgħu, jiskavaw u jibnu. Biex taħdem irid ikun hemm liċenzja. Se jkun hemm proċess biex nibdew u naslu għal dan il-għan. Fil-prattika xi jfisser dan? Mela sal-lum biex wieħed jagħmel dan it-tip ta’ xogħol kull ma kellu jagħmel, kien li jixtri l-apparat u jmur jew iwaqqa’ jew inkella jiskava. 

Illum se ngħidu le.  Se ngħidu li dik hija responsabbilta, u biex nafdawk b’dik ir-responsabbilta int trid tikseb liċenzja. U dan għal żewġ raġunijiet. L-ewwel. Biex min jaħdem jaf li jrid jilħaq ċerti kriterji. It-tieni. Biex min ma jaħdimx skont it-termini tal-liċenzja, allura jiffaċċja l-konsegwenzi, multi u jekk hemm bżonn sospensjoni tal-istess liċenzja.”

B’dan il-mod nassiguraw li min jaħdem fis-settur tal-kostruzzjoni, jaħdem b’serjeta’ u b’rispett lejn ħaddieħor.

Dwar il-konċessjoni tal-isptarijiet, il-Prim Ministru saħaq kif il-Gvern se jkun qed jara li l-obbligi li ma ġewx onorati minn Steward tħallas ta’ dak in-nuqqas. 

“Kull deċiżjoni li se nieħdu, se noħodha bi trasparenza, bla ħabi. Jekk kien hemm xi ħaġa li għamilna, anke f’din l-aħħar sena hi jekk kien hemm ftehim fuq art, morna bih parlament bl-iktar mod trasparenti.” 

Robert Abela semma wkoll kif fl-aħħar jiem, żamm numru ta’ laqgħat ma’ membri ta’ unions fis-settur biex jisma’ mingħandhom u jiddiskuti. 

Gvern li mill-isfidi joħroġ aktar b’saħħtu

“Ir-riżultati ma nkisbux b’kumbinazzjoni. Kienu frott ta’ sensiela ta’ deċiżjonijiet. Il-Gvern ta sostenn ta’ kważi biljun u nofs ewro relattat mal-pandemija u biljun ewro ieħor biex nżommu prezzijiet stabbli tal-enerġija u fjuwil. Ħaddieħor qal li dan sparpaljar ta’ flus il-poplu. Li żidna d-dejn nazzjonali. Li mhux sostennibli.”

Mistoqsi dwar kif tliet snin ilu feġġ l-ewwel każ tal-Covid 19 f’pajjiżna, il-Prim Ministru saħaq li l-aktar ħaġa li jiftakar fiha hu kemm hu kburi b’dan il-poplu li ħriġna minn din l-isfida daqshekk malajr bis-saħħa ta’ kulħadd u dħalna għal din il-fażi ġdida fejn Malta, kif għamlet fl-aħħar snin, se tibqa’ miexja ’l quddiem b’fiduċja.