“Gvern b’saħħtu u Partit b’saħħtu. Kif iżżommha din is-saħħa? Billi tibqa’ għaddej bil-bidliet. Bidliet li żgur mhux l-aktar ħaġa komda li tista’ tagħmel. Il-komdu hu li tibqa’ kif tkun u tipprova ssib raġuni biex il-bidla ma tagħmilha qatt. Jekk ma tagħmilx il-bidliet tistgħaġna. Jekk ikollok il-kuraġġ li tagħmel il-bidliet, timxi ‘l quddiem.”
Dan qalu l-Prim Ministru u Mexxej tal-Partit Laburista, Robert Abela f’diskors waqt il-plenarja tal-Konferenza Ġenerali Straordinarja tal-Partit Laburista. Plenarja li fiha kien hemm qbil unanimu mid-Delegati tal-Partit Laburista li jkun hemm bidla fl-Istatut fil-mod kif jiġi maħtur id-Deputat Mexxej għall-Affarijiet tal-Partit Laburista.
Il-kariga ta’ Deputat Mexxej għall-Affarijiet tal-Partit Laburista mhux se tiġi okkupata minn Membri Parlamentari. Barra minn hekk, min jokkupa din il-kariga mhux se jitħalla joħroġ għall-elezzjoni ġenerali sakemm ikun ilu sentejn li spiċċa mill-istess kariga.
“Ikollok il-kuraġġ li tbiddel biex iżżomm pajjiż relevanti. F’għeluq il-100 sena mit-twelid tal-Partit Laburista flok qegħdin niċċelebraw, qegħdin inkomplu nbiddlu. Stajna qgħadna komdi niċċelebraw il-kisbiet. L-ikbar prijorita’ tal-lum hi dik li nkomplu niġġeddu.”
Il-Prim Ministru saħaq li kull meta ttieħdu deċiżjonijiet mill-Partit Laburista dejjem ħallew il-frott mixtieq. “Ħafna minnkom kontu protagonisti. Illum qed terġgħu tkunu protagonisti. Irridu nifhmu aħna x’irridu minn dan il-partit. Żgur li nara partit li jkun ta’ skrutinju fuq il-Gvern filwaqt li tinżamm distinzjoni ċara….Fuq kollox, il-Partit jrid jibqa’ katalista tal-ideat. Il-membri jersqu bl-ideat tagħhom. Dak ifisser partit tan-nies. Qed inwasslu messaġġ ċar. Mhux in-nies jiġu għandna, aħna mmorru għand in-nies.”
Robert Abela sostna kif iż-żgħażagħ u l-parteċipazzjoni wiesgħa tan-nisa jridu jkunu protagonisti fit-tmexxija. “Trid tinbidel illum qabel għada. Għada huwa tard.”
Il-Prim Ministru irrefera wkoll għall-mudell ta’ suċċess li Gvern Laburista adotta fl-aħħar xhur. “Suċċess mill-aspett mediku fejn ma ħallejniex it-tbassir imexxina hu imma konna aħna li ħadna l-pajjiż fid-direzzjoni li ridnieh aħna… Xhur fejn ħdimna bilgħaqal imma konna nafu fejn irridu naslu.”
“Kburi bil-mod kif mexxejna dan il-pajjiż f’mument diffiċli. Ħriġna minn dan il-mument aktar magħqudin bħala poplu… Iċ-ċertifikat li ngħatajna mill-Kummissjoni Venezja huwa wieħed ta’ eċċellenza, ta’ pajjiż li llum issettjajna standards ġodda ta’ governanza tajba.”
Robert Abela semma wkoll rapporti li qalu li l-pajjiż se jeħel fil-Moneyval. Għal dan, il-Prim Ministru kellu messaġġ wieħed. “Bl-istess mod kif għaddejna b’suċċess il-pandemija u l-Kummissjoni Venezja, bl-istessm mod se nkunu qed ngħaddu minn dan it-test… Issa huwa l-mument li nħarsu ‘l quddiem għal aktar ħolqien ta’ ġid għal pajjiżna sabiex inkomplu nkattru l-ġid u noħolqu l-impjiegi. Din hija l-garanzija li qed nagħtu bħala gvern għaliex verament nixtiequ li għada jkun aħjar mil-lum.”
