aħbarijiet

May 4, 2019

Il-fatti jgiddbu lil Delia dwar is-serq mid-djar f’Tas-Sliema

Maħruġa mill-Uffiċċju tal-Komunikazzjoni tal-Partit Laburista  

Il-fatti jgiddbu lil Delia dwar is-serq mid-djar f’Tas-Sliema

It-tieni gidba fi 48 siegħa

Il-Kap tal-Oppożizzjoni, Adrian Delia, qed jibqa’ jibbaża l-politika tiegħu fuq l-esaġerazzjonijiet, il-biża’ u l-fatti żbaljati. Reġa’ għamel hekk il-Ġimgħa filgħaxija meta kien qed jitkellem f’Tas-Sliema u qal li n-nies f’Tas-Sliema qed jagħmlu saħansitra t-tielet bieb minħabba r-rata ta’ serq f’Tas-Sliema.

Iżda, il-fatti juru li d-dikjarazzjoni ta’ Delia mhi xejn għajr minn sensiela oħra bbażati fuq il-biża’, imma fuq kollox kontra l-verita’ tal-fatti.

Meta tkellem fix-Xagħra Għawdex, il-Ministru Michael Farrugia żvela kif imqabbel mal-aħħar sena tal-Partit Nazzjonalista naqsu bi 30% r-rapporti ta’ serq minn djar f’Tas-Sliema.

“L-aħħar sena (2012) li kien hemm fit-tmexxija l-PN kien hemm 76 serqa minn djar Kienet l-iktar sena fejn kien hemm rata ta’ serq minn djar ġewwa Tas-Sliema,” żvela l-Ministru Michael Farrugia. Is-sena li għaddiet kien hemm 55 każ.

Filwaqt li ta lista twila ta’ miżuri li qed jieħu l-gvern biex jissielet il-kriminalità u jtejjeb ir-riżorsi u l-kundizzjonijiet tal-forzi tal-ordni, il-Ministru Michael Farrugia espona l-qerq ta’ Adrian Delia anke dwar l-argument. Qerq li hu parti mill-politika tal-Partit Nazzjonalista bbażata fuq il-biża’.

Adrian Delia għat-tieni darba qal fatti mhux minnhom. Waqt dibattitu bejn il-mexxejja qal li naqsu l-edukaturi, meta fil-fatt l-edukaturi żdiedu.

Il-kampanja ta’ Delia hija waħda bbażata fuq il-biża’ u n-negattivita’, billi jbeżża b’fatti li ma jeżistux.

Uffiċċju Komunikazzjoni

Partit Laburista