Skip to content

Maħruġa mill-Uffiċċju tal-Komunikazzjoni tal-Partit Laburista

 

Il-Partit Nazzjonalista jrid jilgħab bid-demokrazija

 

Li kien għall-Partit Nazzjonalista ma sarux elezzjonijiet għall-Kunsilli Lokali f’numru ta’ lokalitajiet madwar Malta u Għawdex u fihom l-elezzjonijiet se jsiru grazzi għall-fatt li l-Partit Laburista għandu tim b’saħħtu ta’ kandidati. Tim li se jagħti għażla b’saħħitha liċ-ċittadini tal-lokalitajiet kollha madwar il-pajjiż.

 

Il-Partit Laburista espona dan f’konferenza tal-aħbarijiet li fiha tkellmu d-Deputati Mexxejja tal-Partit Laburista, Chris Fearne u Chris Cardona u l-President tal-Partit Laburista, Daniel Micallef.

 

Id-Deputat Prim Ministru, Chris Fearne qal li “fil-ħamsa u għoxrin ta’ Mejju il-Partit Nazzjonalista jixtieq li f’numru ta’ lokalitajiet, il-votanti jibqgħu d-dar. Dan għaliex f’numru ta’ lokalitajiet, il-Partit Nazzjonalista għandu kandidati daqs jew anqas kemm għandu mill-kunsilliera attwali.”

 

Id-Deputat Mexxej tal-Partit Laburista, Chris Cardona saħaq li “joħroġ ċar u b’mod inekwivoku l-fatt li s-sitwazzjoni li għaddej fiha l-Partit Nazzjonalista, lanqas in-nies tal-Partit Nazzjonalista stess m’huma jemmnu fihom stess.” Fil-fatt f’Għawdex hemm Sindki li kienu jikkontestaw f’isem il-Partit Nazzjonalista li din id-darba se jikkontestaw b’mod indipendenti.

 

Il-President tal-Partit Laburista fakkar kif fis-snin preċedenti, kien l-istess Partit Nazzjonalista li rtira kandidati biex ma jsirux elezzjonijiet. “Din id-darba, il-Partit Nazzjonalista pprova b’mod sottili lanqas ikollu kandidati biżżejjed biex jevita l-elezzjonijiet f’numru ta’ lokalitajiet u li kieku ma kienx għall-Partit Laburista li għandu kandidatura b’saħħitha mmens, kien ikun hemm lokalitajiet fejn ma jsirux elezzjonijiet.”

 

It-tliet kelliema tennew li dak li prova jagħmel il-Partit Nazzjonalista huwa raġuni oħra għaliex iċ-ċittadini għandhom joħorġu jivvotaw.

 

 

Uffiċċju Komunikazzjoni

Partit Laburista

 

Aqsam ma' ħaddieħor

Share on facebook
Share on twitter
Share on linkedin