Maħruġa mill-Uffiċċju tal-Komunikazzjoni tal-Partit Laburista

Il-PL bl-akbar grupp ta’ kandidati fl-istorja għall-KL

Il-Prim Ministru u Mexxej tal-Partit Laburista, Joseph Muscat, tkellem kif il-kandidatura tal-Partit Laburista għall-elezzjonijiet tal-Kunsilli Lokali huwa l-ikbar grupp li partit politiku qatt ippreżenta fl-istorja ta’ pajjiżna kemm ilhom isiru l-elezzjonijiet tal-kunsilli lokali.

Joseph Muscat tkellem dwar it-tim ta’ 398 kandidat li għandu l-Partit Laburista u kellu kliem ta’ ħajr għas-sehem tagħhom. “Dawn huma persuni li nixtieq nirringrazzjahom talli qegħdin joffru lilhom infushom sabiex ikunu ta’ servizz għall-komunita’ tagħhom.”

Il-Prim Ministru esprima s-sodisfazzjon li l-Partit Laburista għandu b’dan it-tim b’saħħtu ta’ kandidati li qegħdin jirrapreżentaw kull lokalita’ madwar Malta u Għawdex.

“Nieħdu pjaċir li barra milli nikkontestaw għal dawn l-elezzjonijiet, inkunu ta’ servizz għall-komunitajiet tagħna. Aħna qed nippreżentaw tim ta’ kważi 400 persuna li ġej minn ‘all walks of life’ tas-soċjeta’ tagħna,” kompla l-Prim Ministru filwaqt li fisser kif aktar minn terz tal-kandidati huma żgħażagħ u kwart tal-kandidati huma nisa li jirrifletti żieda sostanzjali mill-aħħar elezzjoni tal-kunsilli lokali. Innota s-sehem tal-programm LEAD għal dan it-titjib u fakkar li l-mira tal-Partit Laburista hi li l-kandidatura tibda tkun ugwali. Tkellem ukoll dwar kif il-Partit Laburista għandu numru ta’ kandidati b’diżabilita’ minkejja u hawn saħaq kif dawn il-persuni huma abbli ħafna u d-diżabilita’ qegħda biss f’għajnejna.

“Sodisfatti mmens ukoll bil-firxa reġjonali tal-kandidatura tagħna fejn ninsabu preżenti b’mod b’saħħtu kemm fin-naħa ta’ fuq, kemm fiċ-ċentru u wkoll fin-naħa t’isfel tal-pajjiż u mhux l-inqas f’Għawdex fejn in-numru ta’ kandidati f’Għawdex żdiedet b’mod drastiku,” saħaq Muscat.

Min-naħa l-oħra, il-Prim Muscat tenna li “Huwa ta’ swied il-qalb li b’logħba elettorali, il-Partit Nazzjonalista ried iċaħħad id-dritt tal-vot iċ-ċittadini ta’ 23 lokalita’ madwar 130,000 persuna li ma kienx ikollhom għalfejn jivvutaw li kieku l-Partit Laburista ma preżentax aktar kandidati milli kien hemm bżonn.”

Fl-aħħar nett, il-Prim Ministru għalaq b’żewġ appelli.

Għall-kandidati li se jikkontestaw dawn l-elezzjonijiet sostna, “issa naħdmu għall-25 ta’ Mejju li ġej biex inkunu nistgħu nġibu l-aħjar riżultat possibli iżda wara -25 ta’ Mejju, l-ewwel ma tiġi hija l-lokalita’.”

B’appell liċ-ċittadini kollha ta’ Malta u Għawdex, il-Prim Ministru esprima l-ħtieġa li kull wieħed u waħda minnha joħroġ jvivvota, jagħmel l-għażliet tiegħu u jiġġudikaw. “Induru bieb bieb, triq triq, jien l-ewwel wieħed ma’ sħabi u mal-kandidati kollha u naraw li dawn iċ-ċittadini li ħaddieħor ried iċaħħadhom mid-dritt tal-vot, ikunu qegħdin hemmhekk biex jagħmlu l-għażla tagħhom.”

Biex żgur jolqot il-bżonnijiet tal-komunitajiet kollha Maltin, il-Prim Ministru fisser kif il-Partit Laburista se jippreżenta “manifest elettorali għal kull lokalita’. Kull lokalita’ ħa jkollna sett ta’ proposti, ċari, tailor-made biex il-komunita’ tara u tifhem li qed nagħtuha importanza speċifika.”

B’hekk, il-lokalitajiet jistgħu jmexxu u mhux isegwu.

Uffiċċju Komunikazzjoni

Partit Laburista