aħbarijiet

September 3, 2023

Il-PM iħabbar liġijiet ġodda li jirregolaw b’mod b’saħħtu lil min iġib ħaddiema barranin

F’intervista fuq ONE Radio li matulha kompla jfisser il-viżjoni tal-gvern f’diversi oqsma, il-Prim Ministru Robert Abela ħabbar li l-gvern se jkun qed jimplimenta liġijiet maħsuba biex jirregolaw lil min iġib ħaddiema barranin bil-għan li jagħmel profitt ta’ malarj, li minnu s-soċjetà ma tieħu xejn. Filwaqt li tkellem fuq proġetti li permezz tagħhom l-ekonomija tikber b’mod sostenibbli, il-Prim Ministru qal li n-negozji li se jagħmlu l-qalba diġitali u ambjentali se jibqgħu jsibu l-appoġġ tal-gvern. 

“Kruċjali li pajjiżna jibqa’ jiffoka fuq standards ġodda…fil-ġimgħat li ġejjin se nkunu qed noħorġu abbozz ta’ liġi li jirregola aġenziji li jġibu ħaddiema barranin,” qal il-Prim Ministru li fisser kif se jkunu regoli stretti u li jindirizzaw lil dawk li jridu mudelli li jħallu flus ta’ malajr u s-soċjeta ma tieħu xejn minnu.  B’referenza għall-aġenziji li jġibu l-ħaddiema barranin, il-Prim Ministru qal: “Il-liġijiet li se ndaħlu se jfissru li dawn la ser ikunu jistgħu joperaw bl-addoċċ, ser jiżdidulhom ir-responsabbiltajiet u mhux ser tkun faċli għalihom li jiksbu din il-liċenzja.  Din miżura oħra li toħroġ mill-manifest. Mill-pjan, mill-viżjoni li għandna għal dan il-pajjiż.”

Hu spjega wkoll kif dawn l-istandards serji se jwasslu għal proċess iktar rigoruż, iebes imma fuq kollox serju. Hawn tkellem fuq prinċipji tal-Partit Laburista li jduru mal-ġid komuni u li jridu jaraw li ebda ħaddiema ma jkun sfruttat. 

Malta ġusta 

“Il-punt ta’ tluq huwa wkoll il-ħaddiema tagħna, il-ħaddiema Maltin u Għawdxin. L-unika u l-aqwa riżorsa li għandu pajjiżna. Hawnhekk qed naraw li nagħtu l-aqwa għodda lill-istudenti, apprentisti u ħaddiema tagħna. U għalhekk ninvestu fil-ħiliet, fit-tagħlim u f’opportunitajiet ta’ re-skilling ukoll.” 

Il-Prim Ministru qal dan f’kuntest fejn dak li ma jridux in-nies hu li għall-benefiċċju tal-ftit, ibatu l-ħafna.  “Dan Gvern li żied ix-xogħol u hekk se jibqa’. Għalhekk l-Oppożizzjoni siekta fuq ix-xogħol u fuq l-inqas rata ta’ qgħad li kellu pajjiżna fl-istorja. Imma mhux se nittolleraw min għalih il-ħaddiema barranin huma sempliċi business, jew biex jiffranka jew biex saħansitra jkun il-ħaddiem innifsu t-tranżazzjoni – jew agħar minn hekk – sabiex ma jagħtix kundizzjonijiet aħjar lill-ħaddiema Maltin. Dak la hu ġust fuq pajjiżna, la hu ġust fuq is-soċjeta u lanqas hu ġust fuq il-ħaddiem nnifsu,” qal il-Prim Ministru li tul l-intervista kollha rrefera għal pjani tal-gvern li joħorġu mill-manifest elettorali. 

Inwessgħu l-potenzjal ta’ dan il-pajjiż. Potenzjal li sal-lum l-ebda Gvern ma ħares lejh 

Il-Prim Ministru qal kif meta l-pajjiż jitkellem dwar kif irid ikabbar l-ekonomija bi proġetti ta’ kwalità, ikun qed jitkellem fuq viżjoni li fl-aħħar mill-aħħar qed iwettaqha biex pajjiżna, ħames, għaxar snin oħra ikun aħjar mil-lum. Fosthom fis-settur tal-enerġija. “Enerġija nadifa u prezzijiet stabbli. Għamilna ħafna f’dan is-settur fl-aħħar snin, imma issa rridu nħejju lil pajjiżna għall-ġenerazzjonijiet li jmiss,”qal il-Prim Ministru. 

Il-Prim Ministru semma wkoll kif ekonomikament irridu nikbru iktar, għax jekk ma tikbirx tmur lura, imma nafu li ngħixu fuq gżira żgħira. Fl-istess ħin, iċ-ċittadini tagħna jixtiequ li pajjiżhom ikun kontinwament parti mill-iżvilupp li qed isir madwar id-dinja, li l-benefiċċji li jgawdu minnhom ċittadini oħra jgawduhom huma wkoll, imma fl-istess ħin jitħassbu bl-effetti ta’ dak li nagħmlu. 

“Għall-ewwel darba qed inħarsu lejn żoni barra t-territorju Malti biex nużawhom għal attività ekonomika. Xi ħaġa li qed nagħmlu għall-ewwel darba. Qed noħolqu dawk li jissejħu żoni ekonomiċi esklussivi,” qal Robert Abela. 

“X’inhuma dawn? X’iġfieri t-territorju malti? Għandna l-art, għandna l-baħar li hu l-baħar territorjali tagħna, imbagħad hemm baħar, żona iktar, ‘il barra minnu. Dik se nżiduha bħala territorju minn fejn issir attività ekonomika. Attività ekonomika f’dan il-każ, mingħajr ma niżviluppaw l-art tagħna hawnhekk. Hekk inkunu leaders fl-innovazzjoni. U hekk nikbru f’ setturi ġodda u meta ngħid setturi ġodda nfisser setturi ġodda, mhux dawk li ilhom hawn żmien u li l-Partit Nazzjonalista jgħid li se joħloqhom ġodda.”

Il-Prim Ministru saħaq ukoll kif biex jinħolqu dawn iż-żoni, bħalissa quddiem il-Parlament tressqu 39 emenda u l-inizjattivi l-oħra, inkluż fil-qasam tal-enerġija jibnu fuq dan. 

“Biex noħolqu enerġija rinovabbli sejrin nużaw l-ibħra lil hinn mit-territorju Malti, minflok nużaw aktar l-art limitata ta’ din il-gżira jew il-baħar immedjat… Din hi l-viżjoni tagħna għaż-żmien li ġej. Din hi l-Malta li rridu nħallu għal uliedna,” qal il-Prim Ministru. 

Il-Prim Ministru tkellem ukoll dwar is-settur tas-saħħa u l-anzjanità u fuq l-emfasi ta’ investiment fil-komunità biex iċ-ċittadin jinqeda aħjar.