aħbarijiet

January 22, 2020

Il-PN ma jafx xi jrid, il-PM propona għażla trasparenti u rivoluzzjonarja

Il-metodu ta’ kif jinħatar il-Kummissarju l-ġdid tal-Pulizija propost mill-Prim Ministru hu trasparenti u rivoluzzjonarju. Hu skont ir-rakkomandazzjoni tal-Kummissjoni Venezja li donnu l-Partit Nazzjonalista m’għadux jemmen fiha.

Dak li propona l-Prim Ministru llum ineħħi l-poter assolut minn idejn il-politiku u jitfgħu fuq organu kostituzzjonali li se jkun hu li jipproponi żewġismijiet li minnhom bilfors trid issir l-għażla,  wara sejħa pubblika, u anke jkun hemm grilling pubbliku f’Kumitat Parlamentari. Dan wara sejħa pubblika.

Il-Partit Nazzjonalista mhux kredibbli jitkellem fuq is-suġġett mhux biss għax hu qatt m’għamel bidla bħal din, iżda għax l-anqas jaf xi jrid illum.

Kien hemm żmien fejn kien jgħid li ried approvazzjoni ta’ 2/3 u maġġoranza sempliċi jekk din ma tintlaħaqx, u xahar ilu qal li jrid kumitat mhux politiku jagħmel rakomandazzjoni kif issir il-ħatra. Issa reġa’ mar għall-proposta ta’ 2/3.

Min mhux konsistenti ma jistax ikun kredibbli. Min ma wettaqx il-bidla meta seta’ wettaqha ma jistax jitwemmen li jemmen fil-bidla.

Minflok se jerga’ jkun dan il-gvern li jagħmel bidla kbira fl-interess tar-rule of law.