Skip to content

aħbarijiet

May 3, 2019

Il-u-turn dwar il-mina konferma li l-oppożizzjoni ma tistax toqgħod fuqha

Maħruġa mill-Uffiċċju tal-Komunikazzjoni tal-Partit Laburista  

 

Il-u-turn dwar il-mina konferma li l-oppożizzjoni ma tistax toqgħod fuqha

 

Waqt li kien qed jiġi intervistat waqt attività politika f’Ħal Għaxaq, il-Prim Ministru u l-Mexxej tal-Partit Laburista Joseph Muscat saħaq li b’dak li qal ilbieraħ waqt id-dibattitu l-Kap tal-Oppożizzjoni li għandu d-dubji fuq il-mina bejn Malta u Għawdex juri U-turn wara l-ieħor mill-Partit Nazzjonalista. Sintomu ta’ Partit Nazzjonalista, ta’ Oppożizzjoni li m’għadhiex affidabli.

Il-Prim Ministru sostna li Gvern Nazzjonalista fl-2012 beda l-istudji sabiex issir mina li tagħqad lill Malta ma’ Għawdex u l-istudji qalu li hemm possibilta u li għandha titħaffer taħt qiegħ il-baħar sabiex ma tkunx ta’ ħsara għall-ambjent u fl-2013 kienu qalu li din il-mina ser jagħmluha. Sostna li f’kull budget li sar fl-ewwel leġiżlatura ta’ Gvern Laburista, Simon Busuttil attakka lill Gvern li għadna ma bdejniex il-mina. Sostna li r-risposta tagħna dejjem kienet li qed nagħmlu l-istudji neċċessarji.

Dr Muscat qal li fl-2017 għidna li l-istudji għamilnihom u l-mina tista’ ssir. Sostna li l-Oppożizzjoni fil-Parlament ma vvutawx sabiex jaraw l-istudju l-ewwel, imma vvutaw sabiex il-mina ssir u nimxu mal-istudji kollha li hemm bżonn.

“Din hija U-turn tant kbira fi ftit ġimgħat. Hija xhieda ta’ kif l-Oppożizzjoni ma tistax toqgħod fuqha. Kull darba li jwiegħdu xi ħaġa, ma jwettquwhiex. Illhom jwiegħdu lill-Għawdxin mina mill-2010. Aħna ma nidħkux bil-poplu. Aħna jekk in-nies ngħidulhom hekk, hekk nagħmlu. Dan huwa flimkien mal-viżjoni li nafu fejn irridu naslu flimkien mal-għaqda u għaliex aħna konsistenti, u la lin-nies għidnilhom li ħa nagħmlu l-mina ser nagħmluha,” sostna Dr Muscat.

 

Uffiċċju Komunikazzjoni

Partit Laburista

 

Aqsam ma' ħaddieħor

Share on facebook
Share on twitter
Share on linkedin