Il-Kap tal-Oppożizzjoni għadu ma fehemx li billi jdoqq l-istess diska ta’ dawk li ma jriduhx fil-Partit Nazzjonalista xorta waħda mhu se jasal imkien. Hekk ilu jagħmel għal dawn l-aħħar sena u nofs u xorta waħda jridu juruh il-bieb ta’ barra.

Ir-rapport li jirreferi għalih Adrian Delia huwa rapport, li għalkemm wieħed jieħu nota tiegħu, fih għadd ta’ fatti żbaljati dwar Malta u f’bosta partijiet huwa inkorrett u inġust.

Ħasra li minflok ra li bir-rappreżentanti tiegħu l-Partit Nazzjonalista jaħdem biex dan ikun irranġat reġa’ ġab l-interess partiġjan qabel dak nazzjonali. Saħansitra ried iħaddem proċeduri ulterjuri kontra Malta li l-maġġoranza tal-pajjiżi fl-Assemblea tal-Kunsill tal-Ewropa rrifjutawhom. Dan f’xhieda oħra li mill-messaġġ tal-poplu baqa’ ma tgħallem xejn.

Fuq kollox huwa ironiku li kap ta’ partit li lanqas jista’ jħaddem proċess demokratiku fi ħdanu ħareġ stqarrija jitkellem fuq demokrazija mhedda. Il-Maltin u l-Għawdxin il-verità jafuha. Jafu wkoll għaliex il-Kap tal-Oppożizzjoni qed jitkellem hekk.