aħbarijiet

April 16, 2023

“It-twemmin tagħna poġġejnih fil-manifest Malta Flimkien u qed inwettquh. Għalina dak li jfisser il-ħaddiem.” – il-PM

“Twemmin ta’ opportunitajiet ġodda, twemmin tal-mod kif intejbu s-soċjetà tagħna, twemmin ta’ kif qed noħolqu ekonomija iktar sostenibbli u soċjetà aħjar. U twemmin tpoġġieh f’manifest li mbagħad twettqu.”

Dan qalu l-Prim Ministru u Mexxej Laburista, Robert Abela waqt il-Konferenza Ġenerali tal-Partit Laburista fejn saħaq kif il-poplu jaf x’inhu t-twemmin tal-Partit Laburista għax huwa l-poplu stess li jfassal il-politika ta’ dan il-Partit. It-twemmin tal-Partit Laburista mhux biss jiddefinixxina iżda jikkuntrasta mal-politika mħaddna mill-Partit Nazzjonalista. 

“Ħaddieħor mill-Oppożizzjoni jgħid li jrid isaħħaħ il-ħaddiem – imma għandna esperjenza qarsa ta’ dawn in-nies. Meta jkunu fil-poter jikkastigawh lill-ħaddiem, tawh kontijiet ogħla. Aħna tajnieh garanzija ta’ kontijiet orħos. Ħaddieħor serqilkom il-leave fil-festi pubbliċi meta fdajtuh. Aħna, dan il-Gvern, dak il-leave tajnih lura. U miegħu żidna leave ġdid għall-ġenituri. Ħaddieħor ma ħallasx lill-forzi dixxiplinati. Aħna tajnihom dak il-ħlas. Miegħu tajna dritt li jissieħbu f’unjin u ftehimiet ġodda. Ħaddieħoriffriża l-pensjoni. Aħna żidna l-pensjoni sena wara sena. Il-partit ta’ Bernard Grech naqqas iċ-childrens allowance. Aħna qed inżidu ċ-childrens allowance. Ħaddieħor intaxxa l-paga minima. Aħna dik żidniha u neħħejna t-taxxa minn fuqha.”

Il-Prim Ministru emfasizza kif il-Partit Laburista jibqa’ l-uniku Partit li verament jemmen fi-progress, fir-riformi u l-bidla. 

“Aħna sakemm mhux kulħadd jimxi ‘l quddiem, nibqgħu niġu hawn inħabbtu l-ideat dwar kif irridu nibqgħu ntejjbu l-ħajja tal-Maltin u l-Għawdxin… Għalhekk aħna qegħdin mislufin hawn biex niffurmaw il-pajjiż li rridu għal uliedna. Biex dak il-ħolm nagħmluh realtà.” 

Robert Abela qal kif biex dan isir, iridikun hemm pedament sod biex tibni fuqu.  

“L-ekonomija – u s-soċjal, li joffru kwalita’ tal-ħajja aħjar. Il-pajjiż ma jistax jikber u jimxi ‘l quddiem jekk ma jkollux dawn b’saħħithom. U ma jistax jieħu ħsieb waħda mingħajr l-oħra, għaliex waħda ssostni ‘l oħra. Ma jistax ikollna soċjeta’ li tista’ toħlom li taspira li tilħaq iktar jekk ma nassigurawx dan. U m’hemmx dubju li huwa dan il-moviment, dan il-partit li għandu l-kredibbilta’ biex imexxi l-ekonomija ‘l quddiem. Biex jieħu ħsieb it-tessut soċjali ta’ pajjiżna.”

Il-Prim Ministru spjega wkoll kif din il-kreddibilta’ hija riflessa f’kull settur bil-fatti. 

“Hekk għamilna fl-aħħar jiem bil-pubblikazzjoni tal-istrateġija gdida għas-servizzi finanzjarji. Strateġija maħduma flimkien mas-settur li tant nemmnu fih u li rridu narawh jibqa’ jikber, u se nibqgħu nappoggjawh biex jikber. Minn pajjiż bi sfidi li poġġewh fil-grey list , għal pajjiż bi strateġija ġdida għas-settur li se tarah ikompli jikber iktar milli diġa’ kiber. Fejn se jkollna opportunitajiet ġodda maħsubin biex isaħħu s-settur b’mod sostenibbli. Huwa settur li bħalma fassalna miegħu din l-istrateġija rridu nfasslu miegħu kull pass li nagħmlu u li jista’ jaffettwah.”

Dwar is-settur turistiku, il-Prim Ministru semma kif din is-sena pajjiżna kellu l-aqwa tliet xhur fl-istorja. Dwar is-settur tal-kostruzzjoni qed issir ħidma biex jiddaħħlu livelli ġodda li ma kinux jeżistu qabel fejn bħalissa għaddejja konsultazzjoni dwar il-liċenzjar tal-kuntratturi għall-ewwel darba. 

“Xejn mhu se jiġi mingħajr kritika. Jew mingħajr diskussjoni. Imma tibżgħux mill-kritika. Ibżgħu jekk nieqfu nieħdu d-deċiżjonijiet ħalli ma niġux kritikati. Ħaddiehor hemm irid jeħodna biex mingħalih il-pajjiż jistaġna. U  jien dak mhux se nħallih jiġri , ikunu liema jkunu d-deċiżjonijiet li jkolli nieħu.” 

“Il-Prim Ministru saħaq kif għall-kuntrarju, l-Oppożizzjoni qatt ma jista’ jkollha din il-kredibbilta’. Tkellmu b’mod ċar din il-ġimgħa stess l-esperti indipendenti tal-aġenzija DBRS. Bl-iswed fuq l-abjad qalu li r-riżultat tal-elezzjoni ġenerali li għaddiet huwa garanzija ta’ kontinwita ta’ progress u riformi li se jtejbu lil pajjiżna. Ċar kristall il-kliem tagħhom. Li kieku mhux għall-politika tal-Gvern, tas-sapport fuq l-enerġija, pajjiżna kien bħal pajjiżi madwarna jispiċċa f’riskju ta’ riċessjoni. Ifhmu l-periklu tal-politika ta’ Bernard Grech u n-nies ta’ madwaru li jgħidu li kieku huma fil-Gvern il-prezz tad-dawl jinbidel u jogħla bħal ma jiġri barra. Kieku minflok ikollna ratings pożittivi u tkabbir ekonomiku, kieku Downgrades, awsterita u staġnar bħal qabel l-2013.Ara taħsbu li kieku kien hemm Bernard Grech u l-klikek ta’ madwaru fil-Gvern, kieku l-Enemalta kienet se tkun upgraded. Le. L-istess bħal qabel l-2013. Downgrades. U ara taħsbu li kieku kien jiġri bħalma kellna din il-ġimgħa,  bl-IMF toħroġ tbassir rivedut‘l fuq mill-ġdid ta’ tkabbir ekonomiku għal pajjiżna. Għalhekk għandna nkunu kburin bil-ħidma tagħna.” 

Robert Abela temm b’messaġġ b’saħħtu dwar l-aħna akbar mill-jiena fejn il-progress jitkejjel b’kemm titjieb il-qagħda ta’ dawk l-aktar fil-bżonn. 

“Għalhekk kull meta tiġi sfida quddiemna, nibqgħu sodi. Għax wara kull ma nagħmlu hemm it-twemmin tagħna. It-twemmin Laburista. Għalhekk inħeġġigkom,Komplu aħdmu għal Għawdex u Malta. Komplu ngħaqdu magħna fil-ħidma. Kunu kuraġġużi. Fadlilna ħafna xi ntejjbu għal pajjiżna u l-poplu tagħna. Flimkien konvint li se naslu. Għax għandi fiduċja fikom. Għax għandi fiduċja f’pajjiżna.”