aħbarijiet

March 5, 2023

“Kuraġġużi biex nibqgħu nġibu l-bidla fi spirtu ta’ għaqda bħala pajjiż.” – il-PM 

“Għawdex u Malta Flimkien. Dik l-għajta li ġejna fdati biha u dan huwa t-twemmin li jrid ikollna ta’ kuljum.” 

B’dan il-messaġġ f’Għawdex, il-Prim Ministru u Mexxej tal-Partit Laburista, Robert Abela spjega kif dik l-għajta ta’ sena ilu għadha tgħodd sal-lum għax li kieku ma kienx hemm x’ittejjeb, il-pajjiż illum ma kienx jgħaddi minn proċess ta’ tiġdid li ma kienx żgħir. Li kieku ma kienx hemm x’ittejjeb, ma kinux jittieħdu d-deċiżjonijiet iebsin biex bħala pajjiż nibqgħu mexjin ’il quddiem.

“Miż-żminijiet diffiċli tal-pandemija fejn qalulna li se jkollna eluf kbar ta’ nies qiegħda, sa żmien meta, spiċċajna fil-lista l-griża u ħriġna minnha fi żmien rekord għax konna bilgħaqal u rranġajna fejn kellna nirranġaw saż- żmien li għaddejjin minnu fejn għaddejja Gwerra fir-reġjun tagħna li ħolqot sfida enormi fil-prezzijiet tal-enerġija. U fl-ebda minn dawn il-kriżijiet kbar ma għotorna jew urejna arroganza.  Ħdimna b’għaqal u ħadna l-azzjonijiet li kellna nieħdu u bqajna niksbu riżultati sbieħ ħafna għall-pajjiż, u iva, intejbu l-kwalità tal-ħajja għal kulħadd.” 

Il-Prim Ministru semma wkoll kif quddiem dawn is-sitwazzjonijiet, ħaddieħor dejjem prova juża dawn iż-żminijiet diffiċli biex idaħħal il-firda fil-pajjiż u biex jagħmel gwadann politiku partiġġjan.  

“Daqskemm hu ċert li se naħdem biex qatt ma nħallihom jifirdu l-pajjiż, huwa wkoll ċert li Bernard Grech u t-tmexxija tal-establishment tal-Partit Nazzjonalista ma jistgħux iġibu l-bidla pożittiva f’pajjiżna.”

Robert Abela qal ukoll kif dan il-Gvern la qatt kien u mhu se jkun supperv. 

“Kien għalhekk li fil-Parlament din il-ġimgħa, fuq talba tagħna, iddiskutejna s-sentenza li tat il-Qorti b’rabta mal-konċessjoni tal-isptarijiet. Ippreżentajt il-fatti kif inhuma,  tkellimt dwar il-passi li ħadna u fissirt x’qed naraw għall-ġejjieni. Nhar l-Erbgħa mbagħad il-Qorti semgħet u laqgħet it-talba tagħna biex it-terminu tal-appell fil-każ ta’ Steward ikun wieħed iqsar. Steward oġġezzjonat, imma t-talba tagħna ntlaqgħet.”

Fuq kollox, il-Prim Ministru assigura li se tibqa’ tingħata ċ-ċertezza lill-ħaddiema u l-pazjenti li jieħdu l-kura mill-isptarijiet f’Malta u Għawdex. 

“Għax hekk jixraqlu Għawdex. ħa nfakkarkom ftit kif kien Għawdex fl-2012. Iktar minn disgħa mija u għoxrin Għawdxi dipendenti fuq l-assistenza soċjali u l-benefiċji għal qgħad. Illum għandna erba’ darbiet inqas f’dik is-sitwazzjoni. Minn kull għaxar Għawdxin ta’ eta’ tax-xogħol, erbgħa biss kienu jaħdmu f’Għawdex stess. Qabblu dan mal-lum. Illum mhux erbgħa minn kull għaxar Għawdxin jaħdmu f’Għawdex stess, imma sitta minn kull għaxra. Qabel il-bidla, kien hawn anqas minn għaxar t’elef Għawdxi jaħdem f’Għawdex stess. Dan meta tgħodd il-privat u s-settur pubbliku. Illum għandna dak l-ammont kollu fil-privat biss. Għax Għawdex, kien għadu u jibqa’ fil-qalba tal-prijoritajiet ta’ dan il-gvern.”

Dwar l-investiment Għawdxi, Robert Abela sostna kif fl-aħħar tliet snin, il-Malta Enterprise għenet kważi elf negozju f’inizjattivi maħsuba biex isaħħu u jkabbru k-operat tagħhom tant li ġie approvat mas-16 -il milkjun ewro f’investiment u ngħataw 17 -il miljun ewro fi grants u krediti. 

“U għal ewro li nvestejna f’Għawdex, in-negozji bilgħaqal Għawdxin sarrfuh fid-doppju u baqa’ jikber… Dak hu Għawdex mutur ekonomiku. U biex ikompli jikber il-privat, hawn bżonn investiment akbar mill-Gvern. Għalhekk għaddejjin b’rekord ta’ investiment kapitali. Fl-infrastruttura, ħarsu lejn it-Triq tan-Nadur u tant toroq oħra li qed isiru. Fl-isport, ħarsu lejn iċ-ċentru sportiv u ċ-ċentru akwatiku.”

Aktar minn hekk, il-Prim Ministru saħaq kif Għawdex se jkollu wieħed mill-akbar proġetti ta’ spazji miftuħa li hemm pjanati f’Għawdex u li jridu jiġu diskussi man-nies. 

“Fl-ewwel nofs tas-sena se nkunu nistgħu ntellqu l-konsultazzjoni dwar dan il-proġett fil-qalba tar-Rabat.  Anke hawn irridu niddiskutu magħkom. Għax anke meta tkun qed tipproponi proġett ta’ spazju miftuħ, ikollok diskussjonijiet x’tagħmel mal-komunitajiet. Sibna f’dawn l-okkażjonijiet ukoll fejn trid tikkonvinċi għaliex trid issir din il-bidla u li huwa worth it li mmorru għal xi ħaġa li hi differenti min kif imdorrijin. Fuq kollox irridu l-ideat tan-nies.” 

Il-Prim Ministru temm b’messaġġ ċar ta għaqda u ħidma favur l-aqwa interess tal-Maltin u l-Għawdxin.

“Ejja nibqgħu lkoll naħdmu flimkien. Ħalli dak li vvuttajtu għalih, inwettquh. Inwettquh bil-fiduċja li tagħtuna. Imma fuq kollox Inwettquh bil-fiducja li għandna f’pajjiżna.”