Għin
lill-Partit Laburista
July 19, 2023
L-għan tagħna huwa wieħed – li ssir il-ġustizzja.
“Aħna l-għan tagħna huwa wieħed, li ssir il-ġustizzja. Ma’ dik il-familja se nibqa’ nara li nimxi t-triq kollha magħhom sakemm nara li ssir ġustizzja magħhom.”
Dan qalu l-Prim Ministru u Mexxej Laburista, Robert Abela fil-Gudja intervistat mill-ġurnalist Karl Azzopardi fejn saħaq li l-Gvern dejjem kellu pożizzjoni waħda ċara tul iż-żmien kollu dwar il-każ Jean Paul Sofia.
“Dejjem emminna li inkjesta maġisterjali trid tiddetermina min huma l-persuni li jridu jwieġbu quddiem il-qrati għan-nuqqasijiet tagħhom. L-appell tiegħi sa mill-bidu nett kien biex din l-inkjesta ma ddumx aktar minn kemm għandha bżonn.”
Il-Prim Ministru spjega wkoll il-kwistjoni tad-dewmien fl-inkjesta maġisterjali fejn saħaq kif għandek sitwazzjoni fejn il-maġistrat, kontra dak kollu li tistenna, kellha tagħlaq sal-15 ta’ Lulju u spiċċat talbet estensjoni oħra.
“Dejjem kienet ix-xewqa tiegħi li dejjem emmint li nkunu proċeduralment korretti. L-ewwel li tinqata’ l-inkjesta maġisterjali imbagħad jekk jitħallew pockets li ma jiġux solvuti, ikun hemm mezzi oħra biex tiġi assigurata ġustizzja fil-veru sens tal-kelma.Inkjesta ma tidħolx ġo oħra għax hemm sogri.”
Dwar il-Partit Nazzjonalista, il-Prim Ministru qal kif bħal dejjem, jipprova jsib kull opportunita’ biex ixekkel il-ġustizzja. “Il-Partit Nazzjonalista mhux mill-ġustizzja jinteressah imma li joħloq inċident politiku b’mod partiġjan. L-inqas ħaġa li jrid il-Partit Nazzjonalista hu li jkun hemm is-soluzzjoni f’dan l-episodju. Jirkeb fuq il-weġgħat tal-familja.”
Il-Prim Ministru semma wkoll numru ta’ riformi li bħalma diġa saru, dan il-Gvern se jkun qed jaħdem biex ikompli jirriforma.
“Riforma fejn fl-inkjesti naraw li jkollna numru ta’ maġistrati li ma jkollhomx xogħol ieħor ħlief l-inkjesti biex jgħaġġel iżjed il-proċess tal-inkjesti. Riformi oħra fejn il-vittmi jingħataw drittijiet ġodda biex jipparteċipaw f’inkjesta maġisterjali… Dejjem imxejt b’mod ċar. Inħallu l-istituzzjonijiet jaħdmu imma nibqgħu nappellaw biex iwettqu xogħolhom mingħajr tkaxkir tas-saqajn.
Viżjoni b’saħħitha li nagħtu qalbna għal pajjiż
“Sfidi għandna. Il-pajjiż telaq minn sfida kbira li hija dik tal-pandemija li ħadd ma kien qed jistenniha. Ħriġna minnha, bdiet gwerra u żdiedet il-problema tal-inflazzjoni… Quddiem dan kollu tajna l-għajnuniet lin-nies u se nibqgħu nagħtu. Dħalna f’fażi ġdida: Tkabbir ekonomiku b’saħħtu.”
Il-Prim Ministru Robert Abela emfasizza kif it-tkabbir ekonomiku kien kruċjali biex pajjiżna jidħol fil-fażi li jmiss, nixprunawh u naslu għal tranżizzjoni ekonomika.
“Irridu nfittxu s-soluzzjonijiet. L-ewwel ħaġa kruċjali hija d-dixxiplina. Dixxiplina fejn jidħol it-traffiku. Dixxiplina fejn tidħol il-kostruzzjoni… Filwaqt li nfittxu s-soluzzjonijiet, ma nistgħu qatt insawwtu lil min jiflaħ l-inqas.”
Il-Prim Ministru temm b’messaġġ ċar – “Se nibqgħu naħdmu bis-saħħa biex nikkonvinċu li dan il-partit jista’ jibqa’ joffri viżjoni b’saħħitha li biha nagħtu qalbna għall-pajjiż.”
Uffiċċju tal-Komunikazzjoni
Partit Laburista
Ibgħat id-domanda parlamentari li tixtieq titressaq minn deputat tal-Partit Laburista.
Biex tivvota trid tkun fir-reġistru elettorali. Iċċekja hawn jekk tinsabx fir-reġistru elettorali.
Agħmel kuntatt mal-Uffiċċju tal-Komunikazzjoni tal-Partit Laburista billi tgħafas hawn.
Il-Partit Laburista huwa regolat minn statut. Ara kopja tal-istatut billi tgħafas fuq il-link hawn taħt.