aħbarijiet

August 12, 2023

L-infermiera se jkollhom l-aqwa pagi u l-aqwa kundizzjonijiet li qatt kellhom

“Il-ftehim mal-infermiera dwar ftehim settorjali ġdid se jfisser investiment fi professjoni li hi importanti ferm fis-servizz tas-saħħa, u allura servizz aħjar lill-pazjenti tagħna.”

Dan qalu l-Prim Ministru u Mexxej tal-Partit Laburista, Robert Abela f’intervista fuq ONE Radio fejn esprima s-sodisfazzjon tiegħu għall-mod kif ilbieraħ kienu l-ħaddiema nfushom li approvaw dan il-ftehim b’tant saħħa. Turija oħra ta’ kemm dan hu Gvern impenjat li jtejjeb il-kundizzjonijiet ta’ dawn il-ħaddiema, bħalma hu mpenjat li jkompli jtejjeb il-kundizzjonijiet ta’ ħaddiema oħrajn. 

“Din il-professjoni, bħal oħrajn fis-servizz tas-saħħa hija vokazzjoni. U wieħed jidħol għall-imħabba li jkollu lejn in-nies. Iżda, fl-aħħar mill-aħħar dak li jkun ifittex li jkollu kundizzjonijiet tajba li bihom jgħajjex tajjeb lilu nnifsu u l-familja tiegħu. Qed indaħħlu allowances ġodda filwaqt li nsaħħu dak li hemm…Impenn ieħor li qed inżommu kif imwiegħed,” kompla l-Prim Ministru. 

Il-Prim Ministru qal ukoll kif fil-budget li jmiss se jkompli jittieħdu inizjattivi għal dan il-għan ħalli pajjiżna jibqa’ fuq quddiem nett fl-Ewropa ta’ dawk bl-aktar ekonomiji li joħolqu xogħol. 

Il-Gvern qed juri li fejn għandu x’jaqsam hu, qed jieħu d-deċiżjonijiet favur l-ambjent, favur is-sostenibbilta’.

L-investiment f’Villa Portelli fil-Kalkara li se jsarraf fi spazju miftuħ u li jitgawda mill-pubbliku huwa eżempju ieħor ta’ kif dan il-Gvern kontinwament qed jembarka fuq proġetti li jagħtu spazji ġodda lin-nies fejn imorru mal-familja tagħhom biex jirrilassaw. 

“Spazji ġodda, jew bħal f’dan il-każ spazju li kien mitluq għal ħafna snin u li ħadna d-deċiżjonijiet meħtieġa biex nagħtuh il-ħajja. Dan pajjiż mimli ġojjelli u rridu nieħdu ħsiebhom. Għal Maltin tal-lum, iżda wkoll għal min jiġi warajna.” 

Il-Prim Ministru emfasizza kif din l-idea li ninvestu fi spazji miftuħa hija across government u mhux proġett ta’ entita’ waħda biss. 

“Ir-ritmu li qbadna huwa wieħed tajjeb li jien sodisfatt, iżda wkoll li se nżiduh. Beda x-xogħol fuq ġnien fil-Birgu, li kien wieħed minn numru ta’ proġetti li tfasslu mal-Kunsilli Lokali u qed jiġu implimentati madwar il-pajjiż. 

F’Għawdex, fix-Xewkija, rajna l-bidu tal-ħidma fuq carbon neutral garden f’din il-lokalità li se jkun l-ewwel wieħed tax-xorta tiegħu f’Għawdex. Dawn huma żewġ proġetti oħra kkordinati minn Project Green u li meta tgħaqqadhom kullana tara tieħu l-ħajja l-inizjattiva tagħna li ninvestu fi spazji miftuħa ġodda.”

Robert Abela sostna wkoll kif l-ewwel prinċipju fundamentali li jadotta dan il-Gvern dwar l-ambjent huwa li juri li fejn għandu x’jaqsam hu, qed jieħu d-deċiżjonijiet favur is-sostenibilita’ u favur l-ambjent. Huwa saħaq ukoll li l-ġonna fil-qalba tal-lokalitajiet tagħna, speċjalment f’żoni urbani rridu nippreservawhom. 

“Ta’ spiss iqum dibattitu dwar applikazzjonijiet li jiddaħħlu mal-awtorità tal-ippjanar, li per eżempju jkunu qed jipproponu li jieħdu ġonna f’żoni urbani fil-qalba tal-lokalità. Reġa’ kellna oħra fl-aħħar jiem. Hemm applikazzjonijiet li meta tara teknikament anke xi jgħidu r-regoli u l-liġijiet ikunu ‘non starter’ imma dak li jkun jgħid se jieħu ċans. Spiċċa ż-żmien li ngħidu ħa nieħu ċans. Min jgħid se jieħu ċans jekk xi ħaġa mhix skont il-policy ikun qed jaħli r-riżorsi tiegħu u tal-awtoritajiet u jqajjem agħa għalxejn. U jagħmlu sew Kunsilli Lokali li jitkellmu dwar dawn it-tip ta’ applikazzjonijiet,” qal il-Prim Ministru. 

Il-Prim Ministru tkellem ukoll dwar il-fatt li bħalma l-Gvern qed jagħmel il-parti tiegħu, is-settur privat irid jagħmel tiegħu wkoll. Il-fatt li għandek proprjetà privata ma jfissirx li m’għandekx ċerti obbligi lejn is-soċjetà.

“Filwaqt li dan gvern li kien għadu u se jibqa’ jappoġġja l-investiment, iżda rridu investiment li jagħmel sens fil-prijoritajiet tal-pajjiż. U l-ħarsien tal-ambjent tagħna, il-bilanċ f’dan is-settur hu wieħed minnu. Kif dejjem ngħid ejjew b’investimenti li jagħmlu sens f’din it-tranżizzjoni ekonomika li qed inpoġġu ‘l quddiem u ssibu gvern jappoġjakom.” 

Dwar Ħondoq ir-Rummien, Robert Abela qal li se jsir kif il-Partit Laburista wiegħed fil-manifest elettorali. 

“Aħna ma skoprejnix Ħondoq ir-Rummien din il-ġimgħa. Fil-manifest elettorali għidna ċar li bħala Partit Laburista se naraw li ma jsir ebda żvilupp f’Ħondoq. Dak li wiegħed il-partit, dak li wegħidt jien u dak huwa li se nagħmlu. Issa fil-ġimgħat li ġejjin se jibda l-proċess biex isiru l-bidliet fil-liġijiet taI-ippjanar, nagħtu s-serħan il-moħħ li Ħondoq ir-Rummien ma jkunx żviluppat.” 

L-osservanza tar-regoli tfisser il-ħarsien taċ-ċittadin onest 

“L-iktar messaġġ importanti hu l-osservanza tar-regoli. Li jekk int ġejt f’pajjiżna, jekk kien hemm bżonn tiġi f’pajjiżna, trid tobdi r-regoli ta’ dan il-pajjiż.”

Robert Abela saħaq kif f’pajjiżna sar ħafna xogħol biex ma jsofrix piż sproporzjonat minħabba l-immigrazzjoni illegali lejn l-Ewropa. “Fuq dawk li jiġu f’pajjiżna legalment, se naddottaw l-istess prinċipji. L-istess kontrolli. Fejn int tiġi taħdem hawn biss f’dak il-lok fejn pajjiżna veru għandu bżonn.”

Dwar ir-regoli aktar stretti, il-Prim Ministru semma l-eżempju tar-regoli ġodda li ddaħħlu fil-Y Plates fl-aħħar xhur. 

“Mhux biss biex ma jkollniex numri eċċessivi, iżda wkoll biex inżidu s-sigurtà fit-toroq. Kien hemm meħtieġa deċiżjoni u ħadna d-deċiżjoni t-tajba u li kien hemm bżonn. Fuq quddiem nett li biex int toffri servizz b’karozza Y, irid ikollok liċenzja tagħna, tal-Unjoni Ewropea. Għax mas-sigurtà tal-Maltin u min ikun f’pajjiżna m’għandux ikun hemm logħob. Hija regola li kienet meħtieġa u daħħalniha. Fuq quddiem nett mil-lat ta’ sigurtà. Iżda, imbagħad ukoll mil-lat ta’ numri fejn int jekk għandek ħaddiem hawn trid tibża’ għalih u mhux għandek is-serħan il-moħħ li ġġib kemm trid mingħajr ebda idea ta’ responsabbiltajiet lejh. U nemmen li dik hi miżura li diġà bdiet tħalli effett.”

Il-Prim Ministru qal ukoll kif l-osservanza tar-regoli tibqa’ tgħodd bl-istess saħħa imbagħad meta dak li jkun jasal hawn u jibda jgħix u jaħdem hawn. 

“L-osservanza tar-regoli mhix xi ħaġa ta’ barranin. Iżda tgħodd għal kulħadd f’kull settur u għal kulħadd, inkluż il-Maltin kif sħaqt dan l-aħħar meta tkellimt fuq il-kostruzzjoni u meta tkellimt fuq it-traffiku, fost oħrajn.  U l-emfasi tiegi hawn hi emfasi għax nemmen li l-osservanza tar-regoli tfisser il-ħarsien taċ-ċittadin onest.”

Viċin in-nies 

“Imbagħad is-sabiħ tas-sajf Malti. Il-familji magħqudin, il-lokalitajiet, l-ibliet u l-irħula mżejna. Jien l-appell tiegħi, anke meta fi ftit jiem niċċelebraw Santa Marija, hu biex kulħadd jieħu pjaċir b’mod responsabbli, inħarsu dak li jagħmilna Maltin u fuq kollox ngħixu l-għaqda bejnietna, għax filwaqt li xi ftit pika dejjem jista’ jkun hemm, l-isbaħ ħaġa hi li finalment aħna lkoll nkunu magħqudin bħala Għawdxin u Maltin.” 

Uffiċċju tal-Komunikazzjoni 
Partit Laburista