aħbarijiet

March 21, 2019

Minkejja d-diżabbiltà determinati li jtejjbu l-lokalitajiet

Maħruġa mill-Uffiċċju tal-Komunikazzjoni tal-Partit Laburista    

Minkejja d-diżabbiltà determinati li jtejjbu l-lokalitajiet

Filmat: https://www.facebook.com/partitlaburista/videos/266593200910825/ 

Id-diżabbiltà tista’ tpoġġi numru ta’ sfidi. Iżda d-determinazzjoni twassal biex dak li jkun xorta waħda jaħdem biex iwettaq il-ħolm tiegħu u saħansitra tal-komunità ta’ madwaru.

Il-Partit Laburista għandu ħames kandidati b’diżabbiltà għall-elezzjonijiet tal-Kunsilli Lokali li ġejjin. F’ikla mas-sinjura Michelle Muscat u l-Kap Eżekuttiv tal-Partit Laburista, Dr Randolph De Battista, il-ħames kandidai ddiskutew l-aspirazzjonijiet għal-lokalità tagħhom.

Ma qagħdux lura milli jsemmu dak li jista’ jkun ta’ sfida fil-ħidma tagħhom, iżda daqstant ieħor dehru determinati li jirnexxu.

Clifford Portelli huwa kandidat fuq Raħal Ġdid, Gianluca Cutajar fuq iż-Żurrieq, Jonathan Pace qed jikkontesta għall-Kunsill Lokali ta’ Birżebbuġa u Matthew Chetcuti u Matthew Giordmaina huma kandidati fuq il-lokalità tar-Rabat.

Mas-sinjura Muscat fissru kif l-aspirazzjoni tagħhom li jaħdmu fil-lokalità tmur  lil hinn minn temi li għandhom x’jaqsmu mad-diżabbiltà jew l-aċċessibbilta’. Iktar attivitajiet kulturali u soċjali u infrastrutturali aħjar huma fost it-temi li emfasizzaw.

Is-sinjura Muscat tkellmet dwar ir-riżultati li kisbu l-atleti Maltin fl-ispecial olympics u qalet li dan hu sinjal ta’ kif wieħed m’għandu jaqta’ qalbu qatt.

“Jiena l-iktar ħaġa li laqtitni li tkellimna fuq kollox minbarra d-diżabbiltà li xekkel lil uħud minnhom. Għax huma persuni. Persuni li jgħixu ħajja mimlija, ħajja li fiha għandhom minn kollox, għandhom il-familja, ix-xogħol tagħhom u issa qed jaħsbu biex jagħtu xi ħaġa lura lill-komunità tagħhom,” qalet is-Sinjura Muscat.

“Qed juru motivazzjoni min-nies li ma kellhomx daqshekk challenges f’ħajjithom hija xi ħaġa ta’ ispirazzjoni għalina lkoll biex kollha kemm aħna nkunu pożittivi,” żiedet tgħid.

Min-naħa tiegħu, il-Kap Eżekuttiv tal-Partit Laburista Dr De Battista fisser kif dan hu eżempju ieħor ta’ inklużjoni fis-soċjetà, ispirata mill-Partit Laburista. Bħalma kienu ispirati bidliet oħra li l-Partit Laburista ġab mill-gvern f’dan is-settur.

Uffiċċju Komunikazzjoni

Partit Laburista