L-ewwel Maltija li qatt okkupat din il-kariga

Il-Kap tad-Delegazzjoni tal-Partit Laburista fil-Parlament Ewropew Miriam Dalli, għadha kif ġiet magħżula bħala Viċi-President tas-Soċjalisti u Demokratici fil-Parlament Ewropew. Miriam Dalli hija l-ewwel Maltija li qatt okkupat din il-kariga fil-Parlament Ewropew.

Miriam Dalli qalet li huwa ta’ unur li l-kollegi ewroparlamentari fil-grupp tal-S&D urew fiduċja fiha biex tmexxi ‘l quddiem politika progressiva u soċjali. Fil-fatt, Dr Dalli kisbet 101 vot minn 130.

Fl-ewwel kummenti tagħha wara din il-ħatra, Dalli qalet li se tmexxi politika li tgħaqqad dak li jiġri fil-livell Ewropew mar-realta` li jesperjenzaw il-familji u ċ-ċittadini fl-Istati Membri kollha nkluż Malta.

“Se naħdem biex insaħħu s-suċċessi li diġa għamilna flimkien u fl-istess waqt nibdlu l-isfidi li għandna quddiemna f’opportunitajiet. Irridu nagħtu mbuttatura lill-ekonomija ambjentali, nattiraw investiment ġdid, nsostnu ekonomiji ġodda, nipproteġu u nħejju lill-ħaddiema tagħna u nippreperaw lill-istudenti tagħna għall-karrieri tal-futur. Dan huwa dak li wegħdt li se naħdem fuqu u dan huwa dak li qed nimpenja ruħi li nwettaq,” qalet Miriam Dalli.

F’dawn il-jumejn, il-grupp tas-Soċjalisti u Demokratiċi fil-Parlament Ewropew għażel it-tmexxija tiegħu. Il-President tal-Grupp hija l-iSpanjola Iratxe Garcia Perez.

Miriam Dalli se tkun qed taħdem id f’id ma’ kabinett ta’ disa’ membri parlamentari Ewropej li flimkien se jkunu qed ifasslu l-politika fuq oqsma differenti.