aħbarijiet

April 23, 2023

“Nhar l-1 ta’ Mejju lkoll għandna ċans biex nuru fejn tħabbat il-qalb ta’ dawk ta’ rieda tajba.” – il-PM

“Ir-riżultati tiksibhom billi quddiem l-isfidi tkun hemm mal-ħaddiema u man-negozji. U x’inhuma l-ikbar riżultati li qed niksbu? Ix-xogħol fuq quddiem nett. Ix-xogħol li jfisser opportunitajiet aħjar għaż-żgħażagħ u l-familji Għawdxin u Maltin.” 

Dan qalu l-Prim Ministru u Mexxej tal-Partit Laburista, Robert Abela fir-Rabat fejn esprima s-sodisfazzjon tiegħu għad-diversi laqgħat li kellu din il-ġimgħa ma’ ħaddiema fuq il-postijiet tax-xogħol.

“Kemm kien sabiħ nisma’ stejjer ta’ min beda jaħdem fl-inqas livelli tal-fabbrika, u baqa’ tiela ftit ftit sakemm sar manager. Dak hu l-ħolm li rridu nagħmlu realtà. Din hi l-mobbilta soċjali li nemmnu fiha. Dawk huma l-karrieri li nitkellmu dwarhom. Għalhekk m’għandna qatt nieqfu naħdmu biex noħolqu l-opportunitajiet ġodda.”

Dwar l-opportunitajiet ġodda, il-Prim Ministru semma wkoll investiment ta’ 12 -il miljun ewro f’fabbrika li ħabbar din il-ġimgħa fejn se ttejjeb l-effiċjenza, tipproduċi zero carbon bl-inqas impatt possibli fuq l-ambjent u aktar ħolqien ta’ mpjiegi. 

“Il-fiduċja li għandhom f’pajjiżna dawn l-investituri waslet biex issa se jkunu qed jinvestu disa’ miljuni oħra. Dan biex jipproduċu iktar u jsaħħu l-preżenza f’pajjiżna. Ifisser li se jimpjegaw iktar inġiniera, iktar tekniċi, iktar ħaddiema mħarrġa u joffrulhom karriera. Karrieri li rrid nara żgħażagħ Maltin lesti biex ikunu huma l-ewwel li joħduhom.”

Robert Abela qal ukoll kif l-għajnuna fl-enerġija għall-investituri fissret li jibqgħu għaddejjin bla skossi. Li minflok bħal ma ġara f’pajjiż oħra jaħsbu biex inaqqsu jew jagħlqu, minflok jibqgħu ffokati fuq kif se jikbru. Kif se jinvestu iktar u kif se jagħmlu l-qalba ambjentali u diġitali. 

Hawnhekk, il-Prim Ministru saqsa għaliex l-Oppożizzjoni ddikjarat li l-għajnuna għandha tieqaf mill-Gvern u bagħat messaġġ b’saħħtu dwar it-twemmin Laburista. 

“Jien se niddikjara hawn. Aħna nemmnu li fejn jidħol il-prezz tal-enerġija, id-dawl u l-ilma għandna nibqgħu ngħinu lill-familji u n-negozji. U jekk temmnu f’dan fl-1 ta’ Mejju, ingħaqdu magħna fil-Belt Valletta ħa nibagħtu messaġġ qawwi favur l-għajnuna lin-nies. Messaġġ qawwi li l-Gvern għandu jkun ta’ spalla għall-ħaddiema u n-negozji u mhux jitfa’ fuqhom il-piż kif għamlet u trid tagħmel l-Oppożizzjoni. Mhux mument li nistrieħu, għax dak li ksibna flimkien għall-familji għawdxin u Maltin, hawn min lest iħottu.”

Dwar ir-rata pożittiva ta’ tkabbir ekonomiku f’pajjiżna, Robert Abela qal kif il-President tal-Bank Ċentrali Ewropew, Christine Lagarde faħħret lil pajjiżna għall-mod kif it-tkabbir ekonomiku qed ilaħħaq rati straordinarji. 

“Ir-riżultati li għandna llum mhumiex ir-riżultati li kellna dejjem. Ir-riżultati li għandna llum huma frott ir-rieda tal-partit tal-ħaddiema, tal-partit tagħna, tal-moviment tagħna li fejn jara l-inġustizzja jġib ġustizzja.” 

Il-Prim Ministru saħaq kif sa ħames snin ilu, għal kull persuna b’diżabilita’ tirreġistra għax-xogħol, kien hawn erbgħa jaħdmu. Illum, għal kull persuna b’diżabilita’ tirreġistra għax-xogħol, hawn kważi għoxrin persuna b’diżabilita’ jaħdmu. 

“Dak hu r-riżultat meta jkollok il-kuraġġ li tidħol għar-riformi u twettaqhom. U dan il-gvern għandu ħafna iktar riformi xi jwettaq. Riformi li ħadd qabel ma kellu l-kuraġġ jidħol għalihom. Nidejna għall-konsultazzjoni pubblika ir-riforma fis-sistema tal-kumpilazzjoni u r-rinviji. Din waħda mill-akbar riformi fil-kamp tal-ġustizzja li se jkunu qatt saru. Riforma maħsuba biex tibda tnaqqas mid-dewmien żejjed.”

Robert Abela sostna li d-differenza netta hija li dan il-Gvern imur il-Parlament biex jipproponi u jressaq liġijiet li jagħmlu differenza pożittiva fil-ħajja tan-nies filwaqt li ħaddieħor imur il-Parlament biex jitkellem u x’ħin iħoss li tkellem biżżejjed, jitlaq ’il barra. 

“Telqu ‘l barra meta qed niddiskutu liġi dwar suġġett sensittiv bħal vjolenza domestika. U l-għada flok daħlu lura u skużaw ruħhom, daħlu jikkunstinjaw u jgħidu s-Segretarju Parlamentari tagħna li kienet qed tressaq din il-liġi – li għadha ħalib ommha fi sninha. Bħal li kieku għax żagħżugħa m’għandix id-dritt li tippromwovi l-bidla. Għemilhom jikxifihom dejjem. Ma jemmnux fiż-żgħażagħ. Aħna konna u nibqgħu l-moviment taż-żgħażagħ. Għalhekk dejjem ridna u se nieħdu iktar inizjattivi biex iż-żgħażagħ ikunu magħna fuq il-mejda tad-deċiżjonijiet.”

Il-Prim Ministru temm b’appell biex fl-ewwel ta’ Mejju, dawk kollha ta’ rieda tajba għandhom jingħaqdu mal-Partit Laburista fil-Belt Valletta. 

“Nhar l-ewwel ta’ Mejju lkoll għandna ċans biex nuru fejn tħabbat il-qalb ta’ dawk ta’ rieda tajba. Il-qalb tal-ħaddiema. Il-qalb ta’ min iħaddem. Il-qalb tal-pensjonant. Ejjew nibqgħu lkoll magħqudin ħalli l-elf proposta ta’ Malta Flimkien jibqgħu jsiru elf kisba ta’ dan il-poplu tagħna.   Żbalji għamilna imma qalbna tafu fejn qiegħda. Qiegħda magħkom. Għax aħna il-Gvern tagħkom. Il-Gvern tan-nies.Magħna taf fejn qiegħed.”