“Kollha kemm aħna nħobbu l-politika u l-pajjiż. Isem pajjiżna mhux se jitla’ ‘l fuq jekk ma jkunx hemm parteċipazzjoni ta’ nisa. Għandna bżonn aktar nisa bħala pajjiż fil-ħajja politika. Tkunux spettaturi. Kunu protagonisti.”

Dan qalu l-Prim Ministru u Mexxej tal-Partit Laburista, Robert Abela waqt attività ta’ Nisa Laburisti bit-tema – Il-flessibilità fuq il-post tax-xogħol.

Il-Prim Ministru saħaq li filwaqt li jemmen bis-sħiħ fil-kapaċitajiet u l-kontribuzzjoni tan-nisa, ir-realtà konsistenti tul dawn l-aħħar 70 sena turi li l-parteċipazzjoni tan-nisa kienet waħda baxxa.

“Inutli noqogħdu nanalizzaw ir-raġuni. M’għandniex naċċettawha iżjed. Mhux minħabba kwistjoni ta’ numru iżda għax konvinti li b’aktar parteċipazzjoni ta’ nisa fil-ħajja politika, il-valur u l-livell se jitla’ ħafna ‘l fuq.”

Robert Abela semma wkoll il-mekkaniżmu li se jkun qed jidħol fis-seħħ mill-elezzjoni ġenerali li jmiss fejn se jiżgura żieda sa 12 -il siġġu mas-siġġijiet li jkun hemm f’dik il-leġiżlatura.

“Fl-elezzjoni ġenerali li jmiss, dawk se jkunu qed jimtlew min-nisa. Il-ħolma tkun li fl-elezzjoni ta’ wara, il-mekkaniżmu ma jintużax u f’ta wara jintuża għall-irġiel.”

Il-Prim Ministru tenna messaġġ ċar. “Dan hu l-mument li naġixxu. U nimplimentaw ukoll. Inħares ‘il quddiem biex din il-ħolma nagħmluha realta’.”

F’ġimgħa fejn suppost qed niċċelebraw is-suċċessi tal-mara, il-Prim Ministru stqarr li ma tantx bdiet sabiħ. Dan minħabba l-inċident li seħħ din il-ġimgħa u li ma jridx jerġa’ jiġri fil-pajjiż. inċident li sarraf f’telfa ta’ mara u omm.

“Messaġġ ċar. Azzjoni ċara. Kulħadd irid iħallas prezz għan-nuqqasijiet tiegħu.”