aħbarijiet

June 3, 2020

Oppożizzjoni inkompetenti li spiċċat tmeri lilha nnifisha

Il-Partit Laburista jinnota l-aħħar stqarrija tal-Partit Nazzjonalista fejn kompla jiżbalja dwar fatti bażiċi fuq il-persuni jirreġistraw għax-xogħol f’pajjiżna.

Il-Partit Nazzjonalista tenna l-iżball tal-Kap tal-Oppożizzjoni Adrian Delia s-Sibt u l-Ħadd li għadda meta qal li f’pajjiżna hawn 11,000 persuna qiegħda.

Fil-fatt ċifri tal-Uffiċċju Nazzjonali tal-Istatistika juru li fl-eqqel tal-pandemija tal-Covid-19, il-qgħad f’April li għadda kien ta’ 3,979 ruħ.

Ironikament 12-il jum ilu, preċiżament fit-22 ta’ Mejju li għadda, anke l-midja Nazzjonalista rrapportat li l-qgħad f’Malta huwa ta’ 4,000 ruħ, jigifieri n-nofs tal persuni qiegħda li ħalliet warajha amministrazzjoni preċedenti meta pajjiżna ma kienx qed isofri minn pandemija.

Huwa kundanabbli għall-aħħar li f’dan iż-żmien tant sensittiv għall-pajjiżna fejn il-Gvern għamel l-almu kollu tiegħu biex salva mal-100,000 post tax-xogħol, il-Kap tal-Oppożizzjoni qiegħed jipprova jirbaħ xi punti politiċi mingħajr ma jindenja ruħu jagħmel l-iktar ħaġa bażika u jiċċekkja l-fatti.

Adrian Delia għandu jagħraf ir-responsabbiltà tiegħu bħala Kap tal-Oppożizzjoni u qabel jitkellem jiċċekkja l-fatti. Almenu f’dan il-każ l-inqas ħaġa li kellu jagħmel kienet proprju li jiċċekkja dak li rrapportat il-midja tiegħu stess.