aħbarijiet

April 25, 2019

Pajjiż b’surplus – Oppożizzjoni b’deficit ta’ kredibilta’

Maħruġa mill-Uffiċċju tal-Komunikazzjoni tal-Partit Laburista

Pajjiż b’surplus – Oppożizzjoni b’deficit ta’ kredibilta’

L-Oppożizzjoni mhix kredibbli meta titkellem dwar il-finanzi tal-pajjiż. Anke għax għandha Kap li minkejja kull statistika uffiċjali tal-Unjoni Ewropea jibqa’ jgħid li pajjiżna m’għandu surplus u jistaqsi fejn hu s-surplus.

Qalu dan id-Deputati tal-Partit laburista Edward Zammit Lewis u Alex Muscat u l-kandiata għall-Parlament Ewropew Fleur Vella f’konferenza tal-aħbarijiet.

Id-Deputat Edward Zammit Lewis saħaq li “dan is-surplus mhuwiex biex niftaħru bih. Is-Surplus imur għand in-nies… Il-Gvern għamel turn-around mis-sitwazzjoni ekonomika tagħna, mis-sitwazzjoni finanzjarja tagħna. Illum mhux nitkelmu fuq deficit. Qed nitkelmu fuq surplus. Illum mhux nitkelmu fuq finanzi mhux sostenibbli pero’ qed nitkelmu fuq  sostenibilta’ ekonomika u finanzjarja għal uliedna u ulied uliedna.”

Is-Surplus qiegħed għand in-nies. Is-Surplus jinħass fl-in-work benefits, children’s allowances, fiċ-ċentri tac-child care b’xejn, trasport b’xejn, żieda fil-pensjonijiet u għexieren ta’ setturi oħra li għamlu d-differenza fost il-familji Maltin u Għawdxin.

Min-naħa l-oħra, l-Oppożizzjoni xorta waħda tibqa’ negattiva quddiem dawn il-fatti konkreti. Id-Deputat Alex Muscat saħaq li “bħala Partit Laburista nemmnu li huwa kważi surreali l-fatt li jkollok Kap tal-Oppożizzjoni li qed jiċċelinġja dawn il-fatti li qed joħorġu mhux biss mill-Gvern iżda anke istituzzjonijiet indipendenti li qed jikkonfermaw dan il-fatt. Min-naħa l-oħra turik li hemm ukoll ċertu dilettantiżmu eonomiku.

“Dan huwa riżultat li ġej minn strateġija ekonomika illi saret mill-2013 li waslitna biex illum qegħdin fejn qegħdin. L-ewwel pass kien li jitraħħsu l-kontijiet tad-dawl u l-ilma…Hija realta’ li fejn qabel konna fl-aħħar tal-klassi in terms tal-excessive deficit procedure imdendla fuq rasna, illum qegħdin fost l-aqwa pajjiżi Ewropej,” sostniet il-Kandidata għall-Parlament Ewropew Fleur Vella.

Uffiċċju Komunikazzjoni

Partit Laburista