aħbarijiet

July 28, 2019

Pajjiżna b’reputazzjoni tajba mmens mal-Kummissjoni Ewropea

F’kollegament telefoniku fuq ONE radio, il-Prim Ministru u Mexxej tal-Partit Laburista, Joseph Muscat sostna li ż-żjara tal-President tal-Kummissjoni Ewropea Jean-Claude Juncker f’pajjiżna ftit tal-jiem ilu kienet żjara importanti għax uriet kif l-istituzzjoni ewlenija tal-UE tħares lejn Malta.

“Il-President Juncker qal affarijiet li kienu pożittivi mmens u turi wkoll il-fatt li pajjiżna għandu reputazzjoni tajba ħafna mal-Kummissjoni Ewropea u mal-Unjoni Ewropea… Hija relazzjoni dinamika u wriet il-veru mod ta’ kif Malta hija stmata tajjeb ħafna fil-fehma tiegħi mill-istituzzjonijiet Ewropej.”

Il-Prim Ministru stqarr li żewġ punti importanti li semma l-President tal-KE Juncker f’pajjiżna kienu l-ekonomija ta’ Malta li sejra tajjeb ħafna u l-fatt li l-eta’ tal-votazzjoni niżlet għal sittax -il sena.

Wara li nnomina lil Dr. Helena Dalli għall-Kummissarju Ewropej, Muscat saħaq li “ċert li ħa tagħmel biċċa xogħol tajba ħafna fil-preparamenti tagħha biex tmur għal hearing quddiem il-Parlament Ewropew. Għandha l-kredenzjali ideali. Nittama li jkun hemm appoġġ mhux bil-kliem imma appoġġ ta’ veru.”

Il-Prim Ministru enfasizza li dan huwa sinjal storiku b’saħħtu li kellu jkun Gvern Laburista li bħalma ħatar Ministru mara, l-ewwel Gvern li għamel żewġ Presidenti nisa u l-ewwel speaker mara, issa kien l-istess Gvern li nnomina mara għall-Kummissarju Ewropew.

Għandna bżonn Oppożizzjoni li nistgħu nitkellmu magħha

Mistoqsi dwar ir-reazzjoni tiegħu wara li ftit tas-sigħat ilu għadda vot ta’ fiduċja fil-Kap tal-Oppożizzjoni, il-Prim Ministru saħaq li filwaqt li fl-Oppożizzjoni, meta wieħed jaħseb li ssolvew l-affarijiet, jinqala’ kapitlu ieħor, issa jittama li “ l-Partit Nazzjonalista u l-Kap tal-Oppożizzjoni jara kif ħa jmexxi ‘l quddiem għax il-pajjiż u l-gvern għandu bżpnn Oppożizzjoni li għandu bżonn jitkellem magħha.

Muscat ta referenza ċara għas-sehem attiv tan-nisa fil-Parlament Malti u kif jixtieq li jkun hemm direzzjoni ċara mill-Oppożizzjoni għaliex fi kwistjoni bħal din, m’hemmx ċar u tond xi

jridu jagħmlu l-Oppożizzjoni.

“Dan hu dak li għandu bżonn il-pajjiż – Oppożizzjoni li tiffunzjona.”