aħbarijiet

May 6, 2019

Proposti ċari għall-ġid tal-komunitajiet

Maħruġa mill-Uffiċċju tal-Komunikazzjoni tal-Partit Laburista  

Proposti ċari għall-ġid tal-komunitajiet

Il-Partit Laburista nieda l-manifesti elettorali tiegħu għal-lokalitajiet madwar Malta u Għawdex. Fil-konferenza tal-aħbarijiet tniedew żewġ tipi ta’ manifesti.  Manifest ġenerali li kull Kunsill Lokali b’maġġoranza Laburista jrid jaħdem fuq il-prinċipji u l-impenji tiegħu. Kif ukoll manifest elettorali għal kull lokalità. Fiż-żewġ każi kien hemm konsultazzjoni estensiva.

Fit-tnedija tal-manifesti l-Prim Ministru Joseph Muscat qal li dan huwa xogħol li sar mill-Partit Laburista fuq medda twila ta’ xhur permezz ta’ konsultazzjoni kontinwa u permezz tal-involviment fil-komunita.

Saħaq li l-punt ewlieni huwa li l-prijorita ta’ ħafna Maltin u Għawdxin illum hi l-kwalità tal-ħajja, il-kwalita tal-ħin li jqatgħu mal-familji, l-kwalita tal-postijiet, il-kwalita tas-servizz li r-residenti jistennew, il-kwalita tal-infrastruttura u l-kwalita tal-indafa fil-lokalitajiet tagħna.

Dr Muscat sostna li l-ambjent huwa fuq quddiem nett tal-aġenda għall-Kunsilli Lokali. Huwa semma wkoll li ser titnieda l-idea li kull sena f’pajjiżna ser tibda tintgħażel belt jew raħal biex tkun il-belt/raħal kulturali tas-sena, fejn l-gvern ċentrali jippromwovi ħafna attivajiet kulturali f’dik il-belt jew raħal.

Il-Partit Laburista għandu seba’ prinċipji ewlenin li rridu Kunsilli Lokali b’maġġoranza Laburista jaħdmu fuqhom. Dawn huma:

• Ambjent fejn ngħixu aħjar
• Trasport Alternattiv
• Infrastruttura Moderna
• Aktar Sigurtà
• Soċjetà li Taħseb f’Kulħadd
• Komunitajiet Attivi u
• Kultura Ħajja

Għal kull prinċipju hemm numru ta’ proposti x’jitwettqu.

“Dawn il-proposti qed jagħtu qabża kbira ‘l quddiem lill-kunsilli lokali u b’dan il-manifest verament nistgħu nuru li l-komunita ser tkun f’qalbna, kif Malta hija f’qalbna,”sostna Dr Muscat.

Uffiċċju Komunikazzjoni

Partit Laburista