aħbarijiet

May 21, 2023

“Se nibqgħu l-Partit tal-bidla. Partit b’viżjoni ta’ fejn irid jieħu lill-pajjiż. Gvern li jibqa’ jieħu d-deċiżjonijiet.” – il-PM

“Pajjiżna baqa’ l-iktar pajjiż li qed joħloq xogħol. U x-xogħol ifisser dinjità. Twelidna bħala l-partit tal-ħaddiema u nibqgħu l-partit tax-xogħol. Għalkemm illum rridu nitkellmu dwar karrieri iktar minn kollox. Karrieri ta’ kwalità.”

F’Marsaxlokk, il-Prim Ministru u Mexxej tal-Partit Laburista, Robert Abela sostna dan ftit jiem wara li l-Kummissjoni Ewropea reġgħet ikkonfermat is-saħħa ekonomika ta’ pajjiżna.

“L-investiment li ħloqna se nibqgħu nsaħħuħ. Kienu jgħidulna l-ħin kollu għax jibnu skola kull sena. Aħna bħalissa għaddejjin bi skejjel ġodda u xogħolijiet kbar, fir-Rabat Malta u r-Rabat Għawdex, l-Imsida, Ħal Għaxaq, Santa Luċija u Nadur fost oħrajn. Inlestu dawn u nibdew oħrajn għax irridu nilħqu livelli ogħla. U nistgħu nitkellmu dwar dan it-tip ta’ investiment għax pajjiżna sejjer tajjeb. Imma għax nafu wkoll li se jmur aħjar.”

Hawnhekk, il-Prim Ministru sostna kif dawn ir-riżultati jinkisbu għax il-Gvern jinvesti fin-nies. Id-differenza netta bejn il-Gvern u l-Oppożizzjoni.

“Jekk żammejna l-kontijiet irħas, l-Oppożizzjoni qalulna li mhux sostenibbli. Jekk tajna ċ-ċekk biex nippremjaw il-bżulija, qalulna li ma kienx hemm bżonnu. Lill-Oppożizzjoni ngħidilha dan Gvern li ma daħħalx taxxi ġodda, anzi naqqashom. Dan hu Gvern li wiegħed li se jkompli jnaqqas it-taxxi u hekk se ngħamlu meta nimplimentaw il-pjan tagħna.  Pjan li vvota għalih dan il-poplu u li rridu nwettquh.”

Dwar is-Summit fl-Iżlanda bejn il-Mexxejja Ewropej aktar kmieni din il-ġimgħa, Robert Abela semma kif Mexxejja ta’ pajjiżi Ewropej oħra saqsew kif Malta rnexxielha terġa’ tiġi l-ewwel fil-lista tad-drittijiet għall-persuni LGBTIQ. “Jien kont sodisfatt ngħidilhom li dakinhar stess, filwaqt li konna hemm qed nitkellmu, konna qed inniedu strateġija ġdida għall-ħames snin li ġejjin. Għax daqskemm irridu nibdlu fejn seta’ sar aħjar, irridu nibnu fuq it-tajjeb kbir li għamilna. It-tajjeb li għandna nkunu kburin bih. Pajiżna huwa leader f’dan il-qasam.”

Fil-qasam tal-enerġija, din il-ġimgħa waqt laqgħa minn 9 pajjiżi tal-Unjoni Ewropea li jmissu mal-Mediterran, il-Gvern mbotta l-idea li r-reġjun Mediterranju jkun hub ta’ enerġija nadifa li jista’ jixpruna l-impenn tal-Unjoni Ewropea lejn Ewropa dekarbonizzata, b’settur tal-enerġija indipendenti. “U jekk issa stabilixxejna t-twemmin li l-Mediterran ikun il-leader. Nista’ nagħtikom il-kelma tiegħi li fil-Mediterran, se tkun Malta l-pajjiż leader bi proġetti inovattivi u ambizzjużi li se nressqu ‘l quddiem fiż-żmien li ġej.”

Robert Abela qal kif dan hu l-mod kif inkomplu ntejbu l-ambjent ta’ pajjiżna. Ilbieraħ daħlet fis-seħħ parti oħra tar-riforma tal-qbiela. Esperti fis-settur ddeskrivewha fost l-aktar deċiżjonijiet kuraġġużi li qatt ra s-settur agrikolu. Hekk hu. Għax aħna għandna l-prijoritajiet tajbin u d-deċiżjonijiet ma nibżgħux noħduhom. Dawn huma l-kisbiet li rridu niffokaw fuqhom u jagħmluna kburin b’pajjiżna.

Bħalma se jagħmluna kburin l-atleti li l-ġimgħa d-dieħla fil-logħob tal-pajjiżi ż-żgħar. “Ejja nkunu warajhom. Naf li se nkunu warajhom. Għax aħna kull fejn naraw il-bajda u l-ħamra ningħaqdu. Atleti minn pajjiżi minn madwar l-Ewropa kollha se nospitawhom hawn. F’dan il-pajjiż sabiħ. Ġo faċilitajiet li nvestejna fihom u li se jitgawdew minn uliedna mhux biss għal dan il-logħob iżda għall-futur.”

Filwaqt li rridu niftaħru u nkunu kburin b’dak kollu li huwa tajjeb, il-Prim Ministru sostna li l-poplu jaf fejn qiegħed miegħu għax fejn naraw affarijiet li setgħu saru aħjar, irridu u se nagħmluhom aħjar.

“Għax jekk ma jsirx hekk inkun qed nikser il-kelma li tajtkom meta sirt Mexxej. Jekk ma jsirx hekk inkunu qed niksru l-kelma mal-poplu Malti meta sena ilu tana mandat tant b’saħħtu biex immexxu lil pajjiżna ‘l quddiem. Ir-rapport tal-Awditur Ġenerali din il-ġimgħa dwar il-kwistjoni tal-isptarijiet huwa prova ċara ta’ kemm prattikajna dak li qed ngħid. F’Ħal Qormi, fl-ewwel attivita politika wara li nħtart mexxej semmejt il-kwistjoni tal-isptarijiet. Kont għidt mill-ewwel li dik kienet kwistjoni li ridt li l-Gvern iħares lejha b’mod aħjar. U hekk għamilna. Jixhed ir-rapport tal-Awditur Ġenerali. Mhux se nintilef fi spjegazzjonijiet tekniċi dalgħodu. Imma l-messaġġ kostanti kien ċar dejjem, wara li qisna kollox. Lil Steward għidnilhom onoraw l-obbligi tagħkom. U r-rapport tal-Awditur Ġenerali wera dan. U x’ironija ux? L-estremisti tal-Oppożizzjoni mbagħad ma kinux lesti biex jilqgħu t-talba tagħna u jiddiskutuh. Ma ridux jiddiskutuh ukoll għax jafu li l-Gvern qiegħed iħares b’kull mod l-interessi ta’ pajjiżna. Qed nieħdu kull pass. F’Malta u anke barra minn Malta. U jafu li meta jgħidu li l-Gvern ma ħa ebda azzjoni ma jkunux qed jgħidu l-verità. U allura dwar l-isptarijiet iffokati u ċari ħafna. Illum bl-isptarijiet f’idejna nibqgħu nsostnu u nsaħħu s-servizz, inħarsu l-ħaddiema, iżda fuq kollox nippjanaw għall-ġejjieni. Dak talab mingħandna l-poplu Malti s-sena li għaddiet u dak li se nkunu qed nagħmlu.”

Il-Prim Ministru temm b’messaġġ ċar dwar kif f’dinja bi sfidi kbar quddiemha, il-Gvern se jkun iffukat biex jibdilhom f’opportunitajiet.

“Hekk jixraqilhom il-familji Għawdxin u Maltin. Li jkollhom Gvern li jibqa ffukat fuq il-bżonnijiet tagħhom. Li jkompli jibni futur isbaħ għalihom u għal uliedhom. Fix-xhur li ġejjin se nkunu qed nibdew ħafna aktar proġetti ta’ fejda għal pajjiżna. Qed ninvestu pakkett ta’ fondi Ewropej li dan il-Gvern innegozja, li hu l-ikbar li qatt kiseb pajjiżna. Issa niffokaw iktar ħidma għall-budget li ġej. It-tieni minn ħamsa. Li se jibni fuq dak li ħabbarna s-sena li għaddiet u jkompli jwettaq l-elf proposta tal-manifest tagħna. Iva, sfidi se jibqa jkollna. Waħda akbar minn oħra. Imma sakemm nibqgħu naħdmu lkoll flimkien, bl-interess ta’ pajjiżna l-ewwel u qabel kollox, konvint li se naslu. Għax dan jibqa l-uniku moviment tal-ideat f’pajjiżna. L-uniku moviment kommess li jtejjeb il-ħajja tal-familji.Grazzi tal-appoġġ tagħkom. Tas-saħħa li dejjem tatu lili u lil sħabi.Se nkomplu naħdmu għalikom. Se nkomplu naħdmu għal pajjiżna. Din hija l-kelma tiegħi. Il-kelma tagħna. U kelmitna nżommuha dejjem għax għandna fiduċja f’pajjiżna.”