aħbarijiet

July 29, 2023

Sinerġija bejn il-viżjoni tal-Gvern u l-imsieħba soċjali

Djalogu tajjeb immens fuq is-settur tal-enerġija u dak li rridu għal pajjiżna 

“Il-forum tal-MCESD, fejn ipoġġu l-imsieħba soċjali, dan il-Gvern jagħtih importanza enormi. Dejjem hekk għamilt kemm ilni Prim Ministru u hekk se nibqa’ nagħmel għaż-żmien li ġej. Speċjalment meta qed nitkellmu fuq kwistjonijiet nazzjonali, sfidi kbar bħal mhi l-bidla fil-klima.”

Dan qalu l-Prim Ministru u Mexxej tal-Partit Laburista, Robert Abela f’intervista fuq ONE Radio fejn spjega kif matul din il-laqgħa, saru diskussjonijiet tekniċi, daqskemm politiċi dwar pjanijiet studjati, dettaljati u li nafu kemm jiswew u kif se jitwettqu. 

Dan wassal għal deċiżjoni biex is-sena d-dieħla minflok se ninvestu €15 -il miljun, se jiġu nvestiti d-doppju – €30 miljun. 

“Issa meta nsemmi dawn iċ-ċifri xi jfissru. Ifissru ċentri ta’ distribuzzjoni ġodda u nkabbru oħrajn, il-bini ta’ għexieren ta’ substations ġodda u nżidu kilometri ta’ cables li jkomplu jagħmlu s-sistema iktar robusta.”

Robert Abela sostna wkoll li mal-MCESD ilbieraħ, spjega kif iċ-ċirkostanzi preżenti jitolbu li dawn il-miżuri nwettquhom iktar malajr u nżidu magħhom. 

“U dan il-pjan, li lbieraħ qsamna mal-imsieħba soċjali fid-dettall u ntlaqa’ b’mod pożittiv. Hu pjan li ftaħnih għad-diskussjoni għax konvinti mill-ħtieġa ta’ dak li qed nagħmlu u miftuħin għal iktar ideat.”

Tema oħra importanti li ġiet diskussa fil-laqgħa tal-bieraħ kienet l-isfida tal-bidla fil-klima. Il-Prim Ministru emfasizza kif bħala pajjiż irridu nibqgħu fuq quddiem nett fl-inizjattivi kontra l-bidla fil-klima. “U kien għalhekk li ħabbart awtorità ffokata fuq hekk. Awtorità li x-xogħol fuqha ilu li beda u li jrid ikollha rwol importanti biex tqajjem kuxjenza dwar is-suġġett, iżda wkoll tindirizza u tipproponi ideat biex intejbu l-qagħda f’pajjiżna. Żgħir kemm hu żgħir pajjiżna lest jagħmel il-parti tiegħu.”

Min-naħa l-oħra, Robert Abela saħaq kif il-Partit Nazzjonalista dejjem jagħżel it-triq tal-partiġġjaniżmu. 

“Il-Partit Nazzjonalista dejjem jagħżel it-triq tal-partiġjaniżmu. Affari tiegħu. Li nista’ ngħid b’ċertezza hi ħaġa waħda. Fl-enerġija mal-Partit Nazzjonalista żewġ affarijiet ċerti dejjem; kontijiet ogħla u inkonsistenza.Kontijiet ogħla għaliex jipproponu x’jipproponu jduru ma’ sistemi li jħallu kollox f’idejn is-suq, ta’ jekk jgħolew barra jgħolew Malta. U l-istess reġgħu għamlu. Li jgħidulna li l-għajnuna mhux sostenibbli. Hemm ma naqblux. Biex ninvestu m’għandniex għalfejn nsallbu n-nies kif għamlu huma.”

Trasparenza sħiħa fil-proċess tal-inkjesta Maġisterjali dwar il-każ Jean Paul Sofia 

“Il-pubblikazzjoni tal-inkjesta Maġisterjali kienet pass ieħor fil-bżonn, li dwar dan il-każ toħroġ il-verità kollha. U biex titqajjem kuxjenza dwar ċerti każi. Għall-ġejjieni, l-importanti, ir-riformi li qed inwettqu. Li nieħdu t-tgħalimiet bħala pajjiż.”

Hekk sostna l-Prim Ministru dwar l-atitudni li mexa biha l-Gvern f’dan il-każ, turija oħra bil-fatti li rridu atitudni differenti u nieħdu t-tagħlimiet. 

“U bħala Gvern bdejna proċessi li jżidu s-serjeta’ fis-settur. Qed indaħħlu regoli fejn ma kienx hemm u rridu nżidu l-infurzar. Din il-ġimgħa stess ħabbarna konsultazzjoni dwar regoli l-ġodda għal-liċenzjar tal-bennejja, li se jkunu qegħdin jikkumplimentaw ir-regolamenti l-ġodda li daħħalna, dwar l-obbligu tal-liċenzjar tal-kuntratturi tat-twaqqigħ, skavar u kostruzzjoni. Hija riforma li se twassal biex nkomplu ngħollu l-livell fis-settur. Dan settur fejn m’għandux ikun hemm kompromessi mal-kwalita’ u s-saħħa u s-sigurtà tan-nies.”

Ħidma mdawwra mal-aspirazzjonijiet tan-nies

“M’hawnx suċċess mingħajr bidla. U aħna dik il-bidla lesti biex nagħmluha flimkien.”

Robert Abela semma dan f’kuntest ta’ tmexxija ta’ pajjiż li ma jiddejjaqx jaffaċċja fejn illum jista’ jsir differenti għax pajjiż b’saħħtu hu dak li jwieġeb għar-realtajiet ġodda. 

“Fil-Parlament Ewropew, il-Partit Laburista għandu erba’ rappreżentanti li qed jagħmlu xogħol tajjeb ħafna. Xogħol favur Malta. Bħalma wara kollox għandu fil-parlament malti. Jien kburi bix-xogħol tal-grupp parlamentari kollu. 

Fl-istess ħin qed  nippreparaw għall-elezzjoni tas-sena d-dieħla, inkluż bl-approvazzjoni ta’ kandidati ġodda li magħhom jiżdiedu oħrajn fiż-żmien li ġej. Approvajna tliet kandidati din il-ġimgħa, Marie Elise, Daniel u Maria Sara. Persuni, nista’ ngħidilhom żgħażagħ anke jekk għandhom esperjenza politika u professjonali, li għandhom esperjenzi differenti fil-ħajja u ħafna enerġija li se jagħtu kontribut importanti ħafna fil-ħidma li rridu nagħmlu.”

Il-Prim Ministru sellem ukoll il-memorja ta’ Ray Mahoney, ikona fil-qasam letterarju u li ta kontribut enormi fl-istazzjonijiet ONE.