“Wassalna messaġġ b’saħħtu favur l-inklużjoni u l-abbiltajiet differenti” – Il-PM

“Wassalna messaġġ b’saħħtu favur l-inklużjoni u l-abbiltajiet differenti” – Il-PM

Jumejn wara li l-Kummissarju tal-Kummissjoni għad-Drittijiet tal-Persuni b’Diżabilità, Oliver Scicluna, ġie approvat unanimament fil-Grupp Parlamentari Laburista u fl-Eżekuttiv Nazzjonali Laburista biex jiġi co-opted fil-Parlament, il-Prim Ministru u Mexxej Laburista, Robert Abela qal li din il-ġimgħa ntbagħat messaġġ b’saħħtu favur l-inklużjoni.

 

“Għall-ewwel darba bgħattna messaġġ b’saħħtu li rridu li persuni b’diżabilità jkunu qed imexxu. Dan huwa l-ewwel pass għal Oliver, għaliex minix nara biss li jkun Membru Parlamentari imma li javvanza iżjed fil-karriera politika. Dan mhux biss għax nemmen li l-Parlament irid ikun dejjem iktar rappreżentattiv tad-diversi setturi fis-soċjetà imma għax nemmen fil-kwistjoni ta’ abbiltajiet differenti.”

 

Il-Mexxej Laburista fakkar li ġimgħa ilu, il-Kap tal-Oppożizzjoni stieden Deputat prospettiv li vvutawlu eletturi Laburisti, biex jaqsam il-Kamra. Fi kliem Robert Abela, din kienet l-iktar stedina anti-demokratika li wieħed seta’ jagħmel.

 

“Qalu li l-proċess li mxejna bih biex eventwalment se ssir il-co-option ta’ Oliver Scicluna fil-Parlament hija anti-demokratika. Mela allura dan ifisser li għandna Kap tal-Oppożizzjoni anti-demokratiku u li kellna żewġ Kapijiet tal-Oppożizzjoni li ġew eletti b’mod anti-demokratiku… Sal-lum ħadd mill-Oppożizzjoni għadu ma feraħ lil Oliver, anzi ħolqu kontroversja meta suppost qegħdin isellmu l-messaġġ b’saħħtu li aħna bgħattna favur l-inklużjoni. Inħoss sens ta’ diżappunt għaliex wara l-ħatra ta’ Oliver, kellu jkollna messaġġ ta’ għaqda nazzjonali.”

 

Il-Prim Ministru saħaq li dan mhux mument ta’ pika u fakkar li dan il-Gvern qiegħed hemm biex jagħmel differenza fil-ħajja tan-nies.

 

“F’din l-aħħar sena kellna bżonn ħafna kuraġġ biex ħadna d-deċiżjonijiet. Iċċelebrajna l-ewwel sena tal-amministrazzjoni l-ġdida. Kellna minn kollox, minbarra honeymoon. Tlaqna f’perjodu ta’ instabilità politika, u wara ftit ġranet ġara dak li ħadd ma antiċipa. Minkejja dan, f’sena waħda, għamilna erba’ budgets.”

 

Il-Prim Ministru fakkar li filwaqt li dan il-Gvern ħa deċiżjonijiet fl-aqwa interess tal-poplu Malti u Għawdxi f’nofs pandemija, ħa wkoll deċiżjonijiet biex kompla jtejjeb il-kwalità tal-ħajja tan-nies, fost l-oħrajn tas-suldati.

 

“Ħaddieħor taf x’għamel din il-ġimgħa? Deputat Nazzjonalista għamel Mistoqsija Parlamentari biex jitfa f’dawl ikrah lis-suldati. Aħna f’nofs pandemija nnegozjajna l-akbar ftehim kollettiv li qatt kellha l-Armata, ħaddieħor għamel kwerela ffirmata minn Deputat Parlamentari Nazzjonalista biex jipprova jitfa’ lis-suldati l-ħabs. Għaliex? Għax kien hemm min ma jiflaħx il-ħidma li għamilna fil-qasam tal-immigrazzjoni irregolari. Din hija l-iktar sena li qatt irrilokajna immigranti minn pajjiżna… Fadal x’nagħmlu għax hija sitwazzjoni fejn il-ġimgħa d-dieħla jaf ikollna pressjonijiet kbar imma trid tkun iffukat u determinat li ssolvi l-problema. Dan huwa Gvern li mhux biss huwa deċisiv, imma li l-isfidi ma jbeżżgħuhx.”

 

Il-Prim Ministru elenka bosta kisbiet fis-sena elfejn u għoxrin, fosthom meta f’Diċembru wasal il-vaċċin kontra l-Coronavirus, meta l-Gvern kiseb l-akbar pakkett ta’ fondi mill-Unjoni Ewropea, kompla jsir ix-xogħol infrastrutturali u saru riformi kbar fil-kostituzzjoni.

 

“F’mumenti tal-pandemija meta tant kien hemm problemi, iddiskutejna l-problema tal-provvista tal-ikel. Dawn forsi ftit japprezzawhom imma r-realtà tal-pressjonijiet li kellna hija li f’mument minnhom saħansitra kellna naħsbu fl-eventwalità li l-provvista tal-ikel għal pajjiżna, tonqos għax jingħalqu l-portijiet. Ma qadniex indoqqu t-trombi imma din kienet realtà li ħsibna għaliha. F’dan kollu waqafna naħsbu f’għada? Bil-kontra, u għalhekk illum nitkellem b’ottimiżmu dwar il-ġejjieni.”

 

Robert Abela nnota li fl-2020, ġew approvati 190 proġett industrijali f’pajjiżna li bejniethom se joħolqu 1,900 impjieg ġdid b’investiment ta’ €140 miljun. B’differenza, fl-2009, Gvern Nazzjonalista kien approva 30 proġett biss.

 

Semma r-riżultati tal-ħidma tal-Gvern, fost l-oħrajn billi fl-2020 inbiegħu aktar minn tliet biljun ewro fi proprjetà, u dalgħodu bdiet tingħata t-tieni doża tal-vaċċin.

 

“Hija kwistjoni ta’ deċiżjonijiet, ta’ lil min jafda l-poplu biex imexxi l-pajjiż, jekk hux it-tim tal-COVID tal-Partit Nazzjonalista li ddeċieda li ma jiddeċiedi qatt, jew lill-awtoritajiet tas-saħħa tagħna. Jien nafda lil Chris Fearne u lil Charmaine Gauci. Jien kif nista’ nafda lil min jgħid li jkun iblah jekk jgħid il-proposti tiegħu? Din hija r-realtà tal-għażliet li jrid jagħmel il-poplu tagħna fix-xhur li ġejjin, bejn min mexxa lill-pajjiż b’mod iffukat fl-iktar perjodu diffiċli fl-istorja u min sal-lum ma jridx jgħid x’għandu x’joffri għal dan il-pajjiż.”

 

Dwar il-mekkaniżmu li se jara rappreżentanza ugwali bejn is-sessi fil-Parlament, il-Prim Ministru għamilha ċara li min se jkun qed jitla b’dan il-mekkaniżmu mhux se jkun Deputat tat-tieni kategorija. Saħaq li dan il-Gvern jemmen fl-importanza tan-nisa u ż-żgħażagħ fit-tmexxija u appella għall-kandidatura f’dan ir-rigward.

 

Bl-istess mod wiegħed li dan il-Gvern se jiddiskuti suġġetti li għal snin twal tpoġġew taħt it-tapit, bħall-ewtanażja.

 

Il-Mexxej Laburista qal li kulħadd qed jistenna l-mument biex ikollna sajf tajjeb u settur tat-turiżmu li jerġa’ jqum fuq saqajh, u qal li jinsab ottimist li se naslu.

 

“Meta tibda tara problema wara l-oħra, ikollok mumenti ta’ qtigħ il-qalb, imma l-fiduċja tan-nies iżżommok għaddej. Tgħid jien kapaċi nilqa’ għal kull sfida għax inħobb in-nies u nara l-futur ta’ kulħadd għada jkun aħjar mil-lum. Ejja ħa nkomplu nsaħħu l-wegħda li nibqgħu viċin in-nies u nemmen li għada jkun aħjar mil-lum u nuru li aħna verament il-Gvern tal-Għawdxin u l-Maltin kollha.”

 

Share