“Xahar ieħor nibdew it-triq lura lejn normalitá sħiħa” – PM

“Xahar ieħor nibdew it-triq lura lejn normalitá sħiħa” – PM

“Fadal l-aħħar sforz. Fadal xahar. Se nibdew b’vantaġġ kbir, vantaġġ ta’ pajjiż b’saħħtu u li baqa’ fuq saqajh.”

Qal dan il-Prim Ministru u Mexxej Laburista Robert Abela f’attività politika fiċ-Ċentru Nazzjonali Laburista fil-Ħamrun u li kienet konformi mal-protokolli kollha mill-Awtoritajiet tas-Saħħa.

Hekk kif il-prospetti dwar il-vaċċin s’issa jidhru pożittivi, il-Prim Ministru Robert Abela qal li minn xahar ieħor dan il-pajjiż jibda t-triq lura lejn in-normalitá grazzi wkoll għall-għajnuna tal-pubbliku fl-aħħar xhur.

“Dan bħal tellieqa tal-karozzi, se nitilqu in pole position u se jtina vantaġġ kbir. Kif stajna nitilqu minn pole position? Għax ħa nkunu minn tal-ewwel li jkollna l-vaċċin. Rajna li jkollna biżżejjed dożi għal kulħadd.”

Hawnekk il-Prim Ministru rrimarka diskors mill-Partit Nazzjonalista hekk kif permezz tad-deputat Maria Deguara, qal li l-vaċċin mhuwiex is-soluzzjoni.

“Kieku hi kienet Ministru tas-Saħħa f’dan il-mument kienet tħallina mingħajr vaċċin. Dawn huma dawk li jippretendu li jmexxu dan il-pajjiż…Illum ngħid li dawn m’għandhomx soluzzjoni u ma jafux ir-realtá hemm barra.”

Għall-kuntratju ta’ dak li qal il-Partit Nazzjonalista, dwar in-nuqqas ta’ dożi li se jkollna, il-Prim Ministru qal li anke l-ewwel konsenja ta’ dożi se tkun ħafna akbar mill-ammont li semma l-Partit Nazzjonalista. Dan filwaqt li minn produttur wieħed biss pajjiżna se jkollu biżżejjed dożi għall-popolazzjoni kollha f’pajjiżna u aktar.

“Ma’ l-ewwel konsenja, ma’ l-ewwel konsenja biss se jkollna aktar dożi milli semmiet hi, se jkollna d-dożi għall-popolazzjoni kollha u iżjed biex nistgħu anke nagħtu donazzjonijiet lil pajjiżi oħra, minn produttur wieħed biss se jkollna biżżejjed dożi għall-popolazzjoni kollha, ħsibna wkoll f’faċilitajiet biex inżommu l-vaċċin fit-temperatura l-korretta u l-għada li jasal il-vaċċin f’Malta, se nibdew inlaqqmu n-nies.”

Dwar is-sidien ta’ barijiet li kellhom jgħalqu minħabba l-pandemija, il-Prim Ministru ħabbar ukoll li ta struzzjonijiet sabiex dawn issa wkoll jibdew jieħdu l-Covid Wage Supplement u li jmur lura għax-xahar ta’ Novembru.

“Lil kull min għandu bar, lil kull min għandu każin se nibqgħu nieħdu ħsiebhom. Għadni kif tajt direzzjoni biex dawk il-bars u każini li ngħalqu fil-bidu ta’ Novembru b’avviż legali u li fetħu wara Marzu u li allura ma kienux qed jirċievu l-Wage Supplement, issa se jibdew jieħdu huma wkoll il-Wage Supplement mhux biss mil-lum imma b’effett mill-bidu ta’ Novembru.”

Il-Prim Ministru Robert Abela tkellem ukoll dwar il-ħidma kbira ta’ Gvern Laburista minkejja l-pandemija. Ħidma li waslet wara li l-Gvern ikkontrolla b’mod tajjeb l-imxija b’kuntrast ma’ pajjiżi oħra Ewropej.

“Għaqdu kif irnexxielna nnaqsu l-qgħad taħt it-3,000 ruħ. L-inqas rata ta’ qgħad minn Marzu li għadda.”

Il-Prim Ministru spjega wkoll kif b’kuntrast ma’ pajjiżi oħra Ewropej anke s-sistema tas-saħħa f’pajjiżna baqgħet tlaħħaq mad-domanda.

“L-infezzjonijiet żammejnihom stabbli. Anke din il-ġimgħa kellna persuni aktar li fiequ milli ġew infettati. Ħallejna n-nies ngħixu. Dik hija d-differenza ewlenija. Ma morniex għal miżuri li ma ħallewx lin-nies jgħixu imma għamilna dak kollu possibbli biex in-nies jibqgħu jgħixu ħajjithom.”

 

Dwar l-għajnuna fil-pandemija mill-Partit Nazzjonalista, il-Prim Ministru rrimarka kif il-kumitat ta’ sorveljanza fuq il-Covid-19 u li huwa magħmul mill-politiċi, sa llum il-ġurnata għadu ma rrakkomanda xejn.

“Ninsabu fit-triq li ngħaddu mill-Moneyval” – PM

“Waqt pandemija, irnexxielna wkoll inġibu isem tajjeb għal pajjiżna barra minn xtutna.”

Hekk sostna l-Prim Ministru hekk kif grazzi għall-ħidma mill-aktar b’saħħitha tal-Forzi tal-Ordni tagħna, pajjiżna jinsab fi triqtu li jgħaddi mill-Moneval.

Il-Prim Ministru tkellem ukoll dwar il-bidliet massiċċi li għamel pajjiżna fil-qasam tas-saltna tad-dritt f’pajjiżna f’tant qasir żmien.

Waqt din l-attivitá politika, il-Prim Ministru mess ukoll mas-suġġett tal-immigrazzjoni u li fih Gvern Laburista kiseb suċċess kbir fl-aħħar xhur.

“F’nofs pandemija lanqas waqafna naħdmu fuq l-immigrazzjoni. Rajna kif irnexxielna nwaqqfu r-rata ta’ wasliet mindu morna l-Libja. Dakinhar inqatgħet il-linja…Li kieku ma saritx dik il-ħidma konnha nfuru. Dakinhar il-ħidma rajtuha b’għajnejkhom u missejtuha b’idejkhom. Il-politika tagħna se tibqa’ waħda biex inwaqqfu l-wasliet.”

Dwar il-qasam ambjentali l-Prim Ministru semma’ l-ħidma li qed issir fil-Marsa Ħamrun Bypass hekk kif bħalissa qed jitħejja ġnien ħadrani vertikali.

Huwa assigura li l-ħidma ta’ dan il-Gvern f’dan il-qasam se tkompli.

“Nemmen li wara din il-pandemija se niksbu aktar suċċessi. Maqgħudin b’rieda waħda, flimkien, pajjiż wieħed li għandu għal qalbu lil Malta u lil Għawdex. Għalhekk ħbieb tiegħi nistgħu nħarsu lil hinn mill-pandemija. Għalhekk Maltin u Għawdxin b’saħħitna ‘l quddiem.”

Share